Túrkistan oblysynda kámelet jasqa tolmaǵan balanyń zorlanýy týraly is aiaqtaldy, dep habarlaidy "Ult aqparat" QR Bas Prokýratýrasyna silteme jasap.
«Bas prokýratýranyń tergeý toby Túrkistan oblysy Abai aýylyndaǵy jas balaǵa jynystyq zorlyq-zombylyq kórsetý boiynsha qylmystyq istiń tergeý amaldaryn aiaqtady. Ádildikti anyqtaý úshin is boiynsha meditsinalyq, psiho-psihiatriialyq, biologiialyq, molekýliarlyq-genomdyq jáne basqa da qajetti sot saraptamalary júrgizildi», - dep habarlady QR Bas prokýratýrasynyń baspasóz qyzmeti.
Zardap shekken taraptyń ótinishi boiynsha saraptamalyq zertteýlerge Resei Federatsiiasynyń, Qyrǵyz Respýblikasynyń jáne Grýziianyń jeke jáne memlekettik sarapshylary tartyldy. Sondai-aq, mamandar retinde naqty mamandandyrylǵan balalar dárigerleri de shaqyrylǵan.
Is boiynsha barlyǵy 14 keshendi sot saraptamasy men 4 zertteý júrgizilgen. QR Qylmystyq kodeksiniń 15-baby 2-tarmaǵyna sáikes jynystyq zorlyq-zombylyq úshin jaýapkershilik 14 jastan bastalady.
«Tórt kúdiktiniń arasynda bir ǵana jasóspirim 14 jasqa tolǵan. Onyń is-áreketteri QR Qylmystyq kodeksiniń 121-baby 4-bóligi (Jas balaǵa qatysty jynystyq sipattaǵy zorlyq-zombylyq áreketter) boiynsha baǵalandy. Qalǵan kúdiktilerdiń 14 jasqa tolmaýyna bailanysty qylmystyq is toqtatyldy», - delingen resmi habarlamada.
Bas prokýratýranyń habarlaýynsha, qylmysqa qatysýshylardyń kámelettik jasqa tolmaýyna jáne ózge de sebepterge bailanysty istiń mán-jaiyn tolyq jariialaýǵa bolmaidy. Qylmystyq-protsestik kodekstiń 532-babyna sáikes, kámeletke tolmaǵandardyń qupiialylyqqa quqyǵy qylmystyq protsestiń barlyq satylarynda saqtalýy tiis.
«Sonymen birge jeke ómirge qol suqpaýshylyqtyń árbir azamattyń konstitýtsiialyq quqyǵy ekenin, onyń memleket qorǵaýynda ekenin eske salamyz. QR Qylmystyq kodeksiniń 147-babynda Tulǵanyń jeke ómiri nemese otbasylyq qupiiasy týraly aqparatty BAQ-ta nemese telekommýnikatsiia jelilerinde taratý úshin qylmystyq jaýapkershilik kózdelgen», - dep atap ótti QR Bas prokýratýrasy.
Eske sala ketsek, 2018 jyldyń naýryz aiynda Túrkistan oblysynda 7 jasar balany urý jáne zorlaý deregi boiynsha qylmystyq is qozǵaldy.
Áleýmettik jelide «Abai aýylyndaǵy mektepterdiń birinde 7 jasar balany joǵary synyp oqýshylary birneshe ret zorlap kelgen» degen aqparat taraǵan bolatyn. Jetkinshektiń ájesi quzyrly organdarǵa aryzdanǵanymen, bul jaitqa qatysty tergeý sharalary júrgizilmegenin aityp shaǵymdanǵan.
Aimaq ákimi Janseiit Túimebaev keleńsiz jaǵdaiǵa bailanysty jaýapty tulǵalarǵa eskertý men sógis jariialap, birqatar qyzmetkerdi jumystan shettetti.
