«Abai», «Ál-Farabi» serialdary Táýelsizdik kúninde ulttyq arna efirine shyǵady. Bul týraly «Astana Media Week 2020» barysynda «QAZAQSTAN» RTRK» AQ Basqarma tóraiymy Lázzat Tanysbai aitty, dep habarlaidy "Ult aqparat".
«Pandemiia otandyq teleserialdar óndirisine kedergi bolǵanymen, óndiris tolyqtai toqtap qalǵan joq. Biyl biz 13 serial túsirip jatyrmyz. Uly Abaidyń 175 jyldyǵyna arnalǵan «Abai» serialynyń, Ál-Farabidiń mereitoiyna arnalǵan «Ál-Farabi» serialdarynyń túsirilim jumystary sál kesheýildedi. Dese de aiaqtap úlgerdik. Osy tusta habarlap ótkim keledi, eki tarihi týyndy da efirge jeltoqsanda, Táýelsizdik merekesinde shyǵady», - dedi Lázzat Tanysbai.
Munan bólek ol osy maýsymda roman jelisi boiynsha túsirilgen «Mahabbat, qyzyq mol jyldar», Táýelsizdikke arnalǵan 100 bólimdi «Zamandastar» telehikaiasy efirge shyǵatynyn aitty.
«Mahabbat, qyzyq mol jyldar» telehikaiasynyń kastingi tolyqtai onlain formatta ótti. Úmitkerlerden 7300-den astam foto, beineótinish kelip tústi. Mundai aýqymdaǵy onlain kasting biz úshin tyń tájiribe boldy. Bul tájiribeni biz odan ary da jalǵastyramyz», - dedi «QAZAQSTAN» RTRK» AQ Basqarma tóraiymy.
