Elordada Abaidyń 175 jyldyq mereitoiyna arnalǵan «Adamzattyń alyby – hakim Abai» atty respýblikalyq aqyndar aitysy ótti, dep habarlaidy "Ult aqparat" «Nur Otan» partiiasynyń baspasóz qyzmetine silteme jasap.
Elbasy N.Á.Nazarbaevtyń «Rýhani jańǵyrý» baǵdarlamasy aiasynda «Nur Otan» partiiasynyń qoldaýymen jáne QR Mádeniet jáne sport ministrliginiń uiymdastyrýymen ótken jyr alamany biyl ótetin aitystardyń betashary boldy.
Aitysty belgili aqyn, aitys janashyry Júrsin Erman júrgizdi. Ol óz sózinde búginde ulttyq qundylyqtarymyzdy dáriptep, uly tulǵalarymyzdy ulyqtap, tarihi ótkenimizdi aishyqtap otyrýymyz – el Táýelsizdiginiń arqasy, aǵa býynnyń qajyrly eńbeginiń jemisi ekenin erekshe atap ótti.
«Prezidentimiz biylǵy jyldy Abai jyly dep jariialady. Jaqynda ǵana Abaiǵa arnalǵan is-sharalardyń bastaýyn ózi kelip ashyp berdi. «Abai jáne XXI ǵasyrdaǵy Qazaqstan» atty maqalasyn bárińiz oqyǵan shyǵarsyzdar. Biylǵy kóptegen sharalar Abaiǵa arnalady. Abai - bizdiń qaǵbamyz, qazaq rýhaniiatynyń temirqazyǵy. Bárimiz boiymyzdy da, oiymyzdy da Abaiǵa qarap túzeýimiz kerek», - dedi Júrsin Erman.
Alaman aitysqa barlyǵy 16 aqyn qatysty. Saidyń tasyndai iriktelgen aitýly aqyndar sóz saiysyna Abai murasyn arqaý etip, uly oishyl usynǵan asyl oilardy, óshpes qundylyqtardy keńinen tolǵady. Uly Abai ósietindegi óskeleń urpaqtyń boiyna jasampazdyq rýhyn sińirý, oishyl synaǵan jaǵymsyz qylyqtardan arylý, kemeńger siltegen adamshylyq jolyn ustaný – aitystyń negizgi taqyrybyna ainaldy.
Bul aitystyń burynǵy aitystardan basty ereksheligi sóz saiysyna túsetin aqyndardyń sahnada jerebe tartý arqyly tutqiyldan juptalýy boldy.
Alaman aitystyń bas júldesi belgili aqyn, «Altyn dombyranyń» eki dúrkin jeńimpazy Muhtar Niiazovqa buiyrdy. Al birinshi oryndy Syr eliniń aqyny Meiirbek Sultanhan ielense, ekinshi oryndy Erkebulan Qainazarov pen Serik Qýanǵan oljalady. Úshinshi oryndy Tilegen Ádilov, Ásem Erejeqyzy, Raýan Qaidarovtar aldy.
Eske sala keteiik, byltyr «Nur Otan» partiiasynyń qoldaýymen elimizdiń óńirlerinde onǵa jýyq respýblikalyq aqyndar aitysy ótken edi. Atap aitqanda, Atyraýda F.Ońǵarsynovanyń 80 jyldyǵyna, Qaraǵandyda S.Seifýllinniń 125 jyldyǵyna, Qostanaida B.Mailinniń 125 jyldyǵyna orai jáne Almaty qalasynda «Otan otbasynan bastalady» atty respýblikalyq aqyndar aitysy uiymdastyrylyp, jyr alamany Batys Qazaqstan oblysynda «Altyn dombyra» aitysymen qorytyndylandy.
Endi mine, sol úrdis biyl da jalǵasyn taýyp otyr. Hakim Abaidyń 175 jyldyǵyna orai respýblikalyq, oblystyq jáne aýdandyq deńgeidegi 20-ǵa jýyq aqyndar aitysy ótedi dep josparlanýda. Odan bólek, Ábý Nasyr ál-Farabidiń 1150 jyldyǵyna jáne Jeńistiń 75 jyldyǵyna arnalǵan aqyndar aitystary uiymdastyrylady.
