Elordadaǵy «Astana Opera» opera jáne balet teatrynda QR Tuńǵysh Prezidenti - Elbasy Nursultan Nazarbaev jáne Memleket basshysy Qasym-Jomart Toqaevtyń qatysýymen Abaidyń 175 jyldyq mereitoiynyń resmi ashylýyna arnalǵan saltanatty shara bastaldy, – dep habarlaidy QazAqparat.
Aita keteiik, 2019 jyldyń mamyrynda QR Prezidenti Qasym-Jomart Toqaevtyń 2020 jyly qazaq halqynyń uly aqyny, aǵartýshysy Abai Qunanbaiulynyń 175 jyldyq mereitoiyn joǵary uiymdastyrýshylyq jáne mazmundyq deńgeide merekeleýdi qamtamasyz etý maqsatynda qaýlysy jaryq kórgen bolatyn. Qaýlyǵa sáikes, Abai mereitoiyn daiyndaý jáne ótkizý jónindegi memlekettik komissiia qurylyp, jalpyrespýblikalyq jospar bekitildi.
Aldaǵy ýaqytta Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiin keshendi jańǵyrtý jóninde qajetti sharalar qabyldanyp, Nur-Sultan qalasynda Abai Qunanbaiulynyń 175 jyldyq mereitoiyna arnalǵan halyqaralyq ǵylymi-praktikalyq konferentsiia ótkiziledi. Konferentsiia jumysyna Germaniianyń Gete institýtynan, Túrkiiadan, Mońǵoliiadan, Qytaidan, Amerikadan jáne Kanadadan, Tatarstan men Ázerbaijan syndy ózge de memleketterden Abaidyń shyǵarmashylyǵy men ómir jolyn zerttep júrgen ziialylar qatyspaq.
Abaidyń 175 jyldyq mereitoiyna arnalǵan sharalar QR Mádeniet jáne sport ministrliginiń 3 mlrd teńge kólemindegi jyldyq josparlanǵan qarjysy esebinen ótedi.
Aita keterligi, QR Prezidenti Qasym-Jomart Toqaevtyń 9 qańtarda jariialanǵan «Abai jáne HHI ǵasyrdaǵy Qazaqstan» atty maqalasynda Abai mereitoiyna orai halyqaralyq, respýblikalyq jáne aimaqtyq deńgeide 500-den astam is-shara uiymdastyrylatyndyǵy aitylǵan. Onyń ishinde tamyz aiynda Semei qalasynda UNESCO-men birlesip ótkiziletin «Abai murasy jáne álemdik rýhaniiat» atty halyqaralyq ǵylymi-praktikalyq konferentsiia eń basty sharaǵa ainalady. Sondai-aq, qazan aiynda Nur-Sultan qalasynda «Abai jáne rýhani jańǵyrý máseleleri» degen taqyrypta halyqaralyq konferentsiia ótedi. Bul jiyndarda Abaidyń tulǵasy men murasy jan-jaqty zerdelenip, onyń shyǵarmashylyǵyn HHI ǵasyrdaǵy jańa Qazaqstannyń igiligine paidalanýǵa jol ashylady.
«Mańyzdy jobanyń biri – uly aqynnyń shyǵarmalaryn on tilge aýdaryp, basyp shyǵarý. Atap aitqanda, Abai eńbekteri aǵylshyn, arab, japon, ispan, italian, qytai, nemis, orys, túrik, frantsýz tilderine tárjimalanady. Aqynnyń ómiri, murasy, qazaq mádenietin damytýdaǵy róli týraly birneshe derekti film jáne «Abai» teleserialy túsiriledi. Aqyn toiynan óner salasy da tys qalmaidy. Respýblikalyq jáne halyqaralyq deńgeide teatr jáne mýzyka festivalderi ótedi. Biylǵy báigeler Abai shyǵarmashylyǵyna arnalady. Ádebiet jáne óner salasyndaǵy úzdik shyǵarmalarǵa beriletin memlekettik syilyq endi Abai atyndaǵy memlekettik syilyq dep atalatyn bolady», - dep jazǵan edi Memleket basshysy.
