Qazaqstanda jastar saiasatyn qarjylandyrý kólemi alǵash ret JIÓ-niń 0,5 paiyzyna jetti. Bul týraly búgin Májilistegi Úkimet saǵatynda QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
Onyń atap ótýinshe, jastarǵa memlekettik qoldaý sharalaryn shartty túrde ekige bólýge bolady. Olar – dástúrli baǵyttar boiynsha iske asyrylatyn jalpy sharalar jáne Jastar jylyna orailastyrylǵan jańa bastamalardy qamtityn arnaiy sharalar.
«Jalpy sharalarmen 2 millionnan astam oqityn jáne jumys isteitin jastar qamtylǵan. Oǵan joǵary bilim alý úshin granttar, stipendiialar, tegin jataqhanalar kiredi. Arnaiy sharalarmen 722 myń adam nemese eldegi árbir besinshi jas qamtylǵan. Ótken jylmen salystyrǵanda jastar saiasatyn qarjylandyrý kólemi 40 esege ósti. Bul kórsetkish alǵash ret ishki jalpy ónimniń 0,5 paiyzyna derlik jetti», - dedi ol.
D.Abaevtyń aitýynsha, Jastar jyly aiasynda memlekettik qoldaýdyń barlyq sharalaryn júielendirý úshin Úkimet Jol kartasyn qabyldady. Qujatta 89 tarmaq bar. Olardyń árqaisysy jastar úshin ómirlik mańyzy bar turǵyn úimen qamtamasyz etý, jumysqa ornalastyrý, bilim berý, jas otbasyn qoldaý jáne áleýmettik belsendilikti damytý syndy máselelerdi qozǵaidy.
«Búgingi kúni 13 pýnkt tolyǵymen aiaqtaldy. Bular naqty is-sharalardy ótkizýdi kózdeidi. Mysaly, «Zeren» jastar jazǵy lageri. Ol jastar kóshbasshylaryna arnalǵan treningter, sheberlik sabaqtar men seminarlar ótkizýge baǵyttalǵan. Qalǵan 76 pýnkt iske asyrylýda. Mysaly, «Jas kásipker» jobasy 3 jylǵa eseptelgen jáne tek 2021 jyly aiaqtalady«, - dedi ministr.
Bul rette ol birneshe jobanyń oryndalmaý qaýpi bar ekendigin de jasyrmady.
«Onyń basty sebepteri – ortalyqtaǵy jáne jergilikti jerlerdegi memlekettik organdardyń kelisilmegen is-áreketteri, jekelegen ministrlikterdi qaita uiymdastyrý nemese jetkizýshilerdiń jekelegen konkýrstarǵa qatysýǵa qyzyǵýshylyǵynyń bolmaýy. Mysaly, 16-tarmaq boiynsha Eńbek ministrliginiń jas qazaqstandyqtardy kásiptik baǵdar berýge baǵyttalǵan «Ózińdi tap» jobasyn iske asyrýy kózdelgen. Birinshi konkýrs ótpedi dep tanyldy. Konkýrstyq rásimder qaita ótkiziledi. Endi bir pýnkt – «Mádeniet ministrliginiń Qazaqstan jas jazýshylarynyń shyǵarmashylyǵyn qoldaý úshin Ádebiet akademiiasyn ashý». Alaida, qazirgi ýaqytta biryńǵai ustanym, kózqaras, biryńǵai tásilder ázirlenýde. Jalpy, biz mundai jobalar boiynsha ońtaily sheshimder izdeýdemiz«, - dedi Dáýren Abaev.
