Juqpaly aýrýlar aýrýhanasy Almaty, Shymkent qalalarynda da salynyp jatyr. Bul týraly QR Aqparat jáne qoǵamdyq damý ministri Dáýren Abaev «Ashyq dialog» baǵdarlamasynda aitty, dep habarlaidy QazAqparat.
«Juqpaly aýrýlar aýrýhanasy Almaty, Shymkent qalalarynda da salynyp jatyr. Mundai aýrýhananyń qajettigine kúmánmen qaraityndarǵa qatysty aitarym: men mundai áńgimelerdi kóńilge almaimyn. Eger aýrýhana salmaǵan jaǵdaida dál osy kúmánmen qaraǵan adamdar bilikti ýaqytyly sheshim qabyldamaǵany úshin kinálar edi. Bul ejelden kele jatqan mysalǵa uqsaidy: áielińmen ursysyp qalsań da, bilik kináli», - deidi QR Aqparat jáne qoǵamdyq damý ministri Dáýren Abaev.
Ol elordada salynǵan juqpaly aýrýlar ortalyǵyna qatysty pikir bildirdi.
«Koronavirýstyń órshýi ártúrli salada júrgen adamdardyń eńbegine jańasha kózqaraspen qaraýǵa úiretti. Qazir múmkindikti paidalanyp, qurylysshylarǵa eńbegi úshin úlken alǵys aitý kerek. Olar da - bizdiń zamannyń qaharmandary. Bul aýrýhana Dúniejúzilik densaýlyq saqtaý uiymynyń barlyq talaptaryna sai. Ol 90% otandyq qurylys materialdarynan salyndy. Ol ýaqytsha gospital nemese konteiner emes. Ol – bizge uzaq jyldar boiy qyzmet etetin aýrýhana. Esterińizde bolsa, bir-eki ai buryn Qytaida aýrýhana keshenin salyp jatqan kezde kóbi bizdiń elde bulai bolýy múmkin emes ekenin aityp kúlip, mysqyldaǵan edi. Qujat jinap, tender ótkizý úshin jáne osyndai ǵimarat salý úshin jyldar ketetinin aitqandar bolǵan. Osylai kúmánmen qaraýshylarǵa 13 kún ishinde jaýap berildi. Basqa is túsken kezde biz jinaqtalyp, kez kelgen tapsyrmany sheshe alamyz», - deidi ol.
Ministr atalǵan aýrýhananyń kerek ekenine kúmánmen qarap, onyń báribir qańyrap turatynyn aitqandardyń pikirine jaýap berdi.
«Men bul aýrýhana ǵana emes, Qazaqstandaǵy barlyq aýrýhananyń ishi bos bolǵanyn qalaitynymdy ashyq túrde aitamyn. Qazaqstandaǵy densaýlyq saqtaý júiesi elimizde aýyrǵandar sany az bolýy úshin jumys istep jatyr. Ókinishke qarai, shynaiy ómirde bári basqasha bolýy múmkin. Ony ózderińiz sezip-bildińizder. Memleket bir kúndik ómirmen júre almaidy. Biz bárine daiyn bolýymyz kerek, sol sebepti de osy aýrýhanany saldyq», - deidi ministr.
