«Tsifrlyq Qazaqstan» baǵdarlamasyn tolyqqandy júzege asyrý maqsatynda qolǵa alynǵan 120 is-sharanyń 20-y biyl qolǵa alynady. «Qazaqstan» Ulttyq arnasyndaǵy «Apta» baǵdarlamasynda qonaqta bolǵan QR Aqparat jáne kommýnikatsiialar ministri Dáýren Abaev osylai málim etti, dep habarlaidy «QazAqparat» tilshisi.
«EKSPO-2017» kórmesinen keiin ne bolady dep kóp adamdar surap jatyr ǵoi. Kórme ǵimarattarynyń bir jaǵy - Qarjy ortalyǵy, ekinshi bóligi ózge de institýt bolyp ashylǵaly jatyr. Sonyń bir ǵimaratyn bizge berdi. Iaǵni, biz sol jerde «Astana Hub» degen jastarǵa arnalǵan arnaiy júieli ǵimaratty beremiz. Sol jerde bizdiń memlekette eńbek etip júrgen kompaniialar talantty jastardy taýyp, IT salasyna qatysty ónim kerektigin aita alady. Sonda otyrǵan jastar atalǵan suranysty qanaǵattandyrar degen oidamyz. «Astana Hub» biyl ashylady», - deidi ministr.
Dáýren Abaev óz sózinde tsifrlandyrý salasynyń el ómirine paida ákeler tustaryn aityp berdi.
«Eki-úsh mysal keltireiin. Mysaly, bizde aýylda malyn soiyp ótkizýge nietti kisiler kóp. Sol maldy aýyl adamdary úshin qalaǵa aparyp, satý máselesi bar. Bizdiń elimizde bári elektrondy saýdany qolǵa alyp, jumys istese, internet bolsa álgi aýyl adamdary úiinde otyryp-aq, malyn onlain-bazar arqyly sata alady. Odan basqa aýyl adamdary kez kelgen qujatty alý úshin aýdan ortalyǵyna nemese qalaǵa barady. Al tyń júie arqyly ol adamdar kóptegen anyqtamalardy úiinde otyryp-aq ala alady», - deidi Dáýren Abaev.
Ministrdiń aitýynsha, jańa tehnologiialar arqyly dárigerler tipti qashyqtyqta da ota jasai alady.
«Qazir Astanada sýyp ketti dep bári aityp jatyr. Kún sýyq bolǵannan keiin qujattar úshin sonaý alystaǵy HQKO-na barýǵa týra keledi. Al tsifrlandyrý júiesi arqyly adamdar qajetti anyqtamany úide otyryp ala alady. Odan basqa aýdandarda qiyn operatsiialardy júrgizý múmkindikteri paida bolady. Bir jaǵynan Almatydan, Astanadan nemese Qaraǵandydan aýyldarǵa dáriger jetkizý ońai emes. Sáti túse me, túspei me - belgisiz. Onlain arqyly videokameralarmen eki dárigerdiń biri (ekinshisi naýqastyń qasynda - avt.) Almatyda qajetti keńes berý arqyly otany júrgize alady. Mysaly, kúrdeli otany júrgizetin 2-3 maman ǵana bolýy múmkin. Ol maman búkil Qazaqstannyń túkpir-túkpirine jete almasa da, arnaiy teleekran arqyly operatsiiaǵa kómegin kórsete alady», - deidi Dáýren Abaev.
Ministr tsifrlandyrý júiesiniń bilim júiesine de kóp paida ákeletinin tilge tiek etti.
«Bilim júiesine keler bolsaq, aýyldarda kitap, maman, muǵalim jetispeidi dep jatady. Tsifrlandyrý sol suraqty da sheshe alady dep oilaimyz. Óitkeni, dúnie júzinde onlain sabaq berý tásilderi óte jaqsy damyp keledi. Sondyqtan, bul jerde de muǵalimder de onlain kýrstardy júrgize alady. Sebebi, aýyldar men qalalardyń arasy alshaqtap barady dep jatyr ǵoi. Jańa tehnologiialar arqyly aýyl men qalany biriktire alamyz degen oidamyz. Elbasy bizge osyndai tikelei tapsyrma berdi. Osynyń bárin biz zerttep, Prezidenttiń ózi qoldap, biz 2017 jyldyń jeltoqsan aiynda «Tsifrlyq Qazaqstan» baǵdarlamasyn qolǵa aldyq», - deidi ol.
Dáýren Abaev aityp ótkendei, biyl atalǵan baǵdarlama boiynsha 2018 jyldan bastap 120 is-sharanyń 20-sy qolǵa alynady.
