QR Aqparat jáne qoǵamdyq damý ministri Dáýren Abaev QR Prezidenti janyndaǵy Ortalyq kommýnikatsiialar qyzmeti qurylýyna qatysty pikir bildirdi, dep habarlaidy QazAqparat.
«Búgin Memleket basshysynyń Jarlyǵymen Ortalyq kommýnikatsiialar qyzmeti QR Prezidenti Ákimshiliginiń basqarýyna berildi. Bárinen buryn, úsh jyldan astam ýaqyt birge jumys istegen OKQ qyzmetkerlerine jyly lebizimdi bildirgim keledi. Qurmetti áriptester, sizderdiń kúsh-jigerlerińiz ári tynymsyz eńbekterińizdiń arqasynda Qyzmet jumysyn aitarlyqtai jańǵyrtyp, onyń tiimdiligi men bedelin jýrnalister, sarapshylar jáne qoǵamdastyq aldynda arttyrýǵa múmkin boldy. Sońǵy býyndy tehnikamen jabdyqtalǵan jańa baspasóz ortalyǵynyń ashylýyn bizdiń ortaq úlken jetistigimiz dep sanaimyn», - dep jazdy Dáýren Abaev áleýmettik jelidegi paraqshasynda.
Osy oraida ministr atalǵan media-alań Elbasynyń, Qazaqstan Prezidentiniń, sondai-aq BAQ ókilderiniń joǵary baǵasyna ie bolǵanyn atap ótti. Tek 2019 jyly osynda 127 shara ótkizildi, iaǵni baspasóz máslihaty, telekópir, sarapshylyq pikir almasý, óńirler men shetelge tikelei bailanysqa shyǵý uiymdastyryldy. Sonymen qatar vedomstvo basshysy OKQ alańynda Qazaqstan Prezidenti sailaýynyń nátijesi jariialanǵanyn eske saldy.
Ortalyq kommýnikatsiialar qyzmeti minbesinen túrli rezonansty oqiǵalar boiynsha málimet taratylǵanyna toqtalǵan D. Abaev, «Elimizdegi qoǵamdyq-saiasi kún tártibi ekpindi túrde ózgerýde. Osy rette aqparattyq blok aldynda jańa mindetter bar. Sondyqtan Memleket basshysynyń búgingi sheshimi osynyń barlyǵyn eskerip, qamtyp tur. Osyǵan bailanysty barshańyzǵa shyn júregimnen sáttilik tileimin jáne isterińiz tek alǵa bassyn. Rahmet!», - dedi.
Budan buryn habarlanǵandai, Memleket basshysy QR Prezidenti janyndaǵy «Ortalyq kommýnikatsiialar qyzmeti» respýblikalyq memlekettik mekemesin qurý jónindegi Jarlyqqa qol qoidy.
Prezident Ókimimen Talǵat Qaliev QR Prezidenti janyndaǵy Ortalyq kommýnikatsiialar qyzmetiniń basshysy bolyp taǵaiyndaldy.
