QR Aqparat jáne kommýnikatsiialar ministri Dáýren Abaevtyń aitýynsha, qazirgi texnologiialyq zamanda básekelestikke tótep berip, aqparat keńistiginen laiyqty oryn alý úshin qazaq tildi internet resýrstaryna birneshe mańyzdy máseleni sheshý kerek, dep xabarlaidy QazAqparat tilshisi.
«Birinshiden, kontentke qatysty kózqarasty ózgertý kerek. Qazirgi kezde aqparattyń mazmunyn qalyptastyrýǵa qoldanýshylar tikelei yqpal ete bastady. Ókinishke qarai, osynyń saldarynan sensatsiianyń sońyna túsken saittar jetkilikti. Árine, bul rette aýditoriiany udaiy zerttep, ár oqyrmannyń suranysyn eskerýge týra keledi. Alaida kez kelgen máselege eldik múdde, ulttyq tanym men tárbie, sondai-aq jýrnalistik etika turǵysynan qaraý qajet dep oilaimyz. Buqaralyq aqparat quraldarynyń áleýmettik jeliden basty aiyrmashylyǵy da, artyqshylyǵy da osy», - dedi D.Abaev búgin qazaq saittary redaktorlarynyń forýmynda.
Ministrdiń aitýynsha, kelesi jyly aýyldyq jerde turatyn 2 mln-nan astam adamǵa sapaly internet tartý jumystary bastalady. Atalǵan sharalar eki jylda aiaqtalady degen jospar bar. Al 2022 jylǵa deiin Qazaqstannyń barlyq aýyldarynda jyldam internet bolady.
«Olarǵa qandai kontent usynýǵa bolady? Mine, osy máseleni saittarymyz qazirden bastap zerttep, kontenttik saiasatty jolǵa qoia alsa, qoldanýshylardyń birneshe esege artatyny sózsiz. Endi, ózderińiz jaqsy bilesizder, aýyldy jerlerde, kóbinese, qazaq tildi baýyrlarymyz turady. Olar aldymen Sizderdiń saittaryńyzǵa keledi, Sizderdiń basty tutynýshylaryńyz bolady», - dep atap kórsetti D.Abaev.
Ekinshi másele, el múddesi synǵa túskende qazaq tildi buqaralyq aqparat quraldary aldynǵy qatardan tabylsa da, ulttyq múddeniń jalań uranmen almasyp ketý jaǵdailary az emes. Atalǵan áreketter, kóp jaǵdaida, arandatýshylyq sipatta kórinis berýde.
«Máselen, Astanadaǵy Ábý-Dabi Plaza oqiǵasyn alaiyq, biz Ishki ister ministrligimen birge zertteý júrgizdik. Sol kúni áleýmettik jelide jurttyń namysyna tiip, janjaldarǵa shaqyrǵan «patriottyq» pikirlerdiń Astanadan jazylmaǵanyn kórdik. Osyndai tasada otyryp, tas atý ádeti beleń alyp turǵany jasyryn emes. Jazǵandardyń kóbisi basqa qalalardan astanalyqtarǵa nege otyrsyńdar, qyryp joimasyńdar ma dep, urandatyp ketti», - deidi ministr Abaev.
Ministrdiń sózine qaraǵanda, dástúrli buqaralyq aqparat quraldary men jańa medianyń qarym-qatynasyn tereńdetý kerek. Bul - úshinshi másele. Sebebi búginde áleýmettik medianyń basymdyǵy jaiynda jii aitylady. Alaida sońǵy zertteýlerge sáikes, teledidar siiaqty dástúrdi buqaralalyq aqparat quraldarynyń yqpaly feisbýkten úsh ese artyq. Sondyqtan dástúrli BAQ pen jańa medianyń múmkindikterin sheber ushtastyra bilgen jón.
