QR Aqparat jáne qoǵamdyq damý ministri Dáýren Abaev Elbasynyń densaýlyǵyna qatysty qaýesetke núkte qoidy, dep habarlaidy QazAqparat.
«Búgingi tańda el taǵdyry týraly sóz qozǵasaq ondaǵy Elbasynyń jańa rólin túsinýimiz kerek. Ol Qaýipsizdiń keńesi men Nur Otan partiiasyndaǵy jumysymen saiasattaǵy belsendi jumysyn jalǵastyryp keledi. Alaida 2019 jyldyń 19 naýryzynda ol Prezident ókilettigin toqtatty. Halyq jańa Memleket basshysyn sailady. Iá, qazir biz salmaqty tegeýrindermen betpe-bet kelip turmyz. Óz ókilettigine bailanysty Prezident Qasym-Jomart Toqaev qazirgi kúrdeli jaǵdailarǵa tótep berý strategiiasyn aiqyndady. Al bulai bolmasa, basqa qalai bolýy tiis? Elbasy mundaida kún saiyn jańa málimdeme jasaýy kerek pe? Ol - óz mártebesine qaramastan mundaiǵa jol bere qoimaityn dana saiasatker», - dedi Dáýren Abaev «Ashyq dialog» baǵdarlamasynda.
Ministr sonymen qatar Elbasynyń densaýlyǵyna qatysty sybystardan da habardar ekenin bildirdi.
«Bul rette esime osydan 10 jyl buryn, iaǵni Prezidenttiń baspasóz hatshysy bolyp taǵaiyndalǵan kezdegi bir oqiǵa esime túsip otyr. Internet saittardyń birinde Elbasynyń aýyr naýqas ekeni týraly jańalyq jaryqqa shyqty. Bul aqparatqa tańǵaldym. Sebebi sol kúni Prezidenttiń tóraǵalyǵymen otyrystardyń birine qatysqan edim. Keshke qarai shydamai ketip, Nursultan Ábishulyna oqyǵan jańalyǵym týraly aittym. Sol kezde ol maǵan: «Meniń qasymda qyzmetińdi endi bastap jatyrsyń. Bir dúnie esińde bolsyn: balaqtyń shańyn qaǵa berseń baratyn jerge ýaqytynda jete almaisyń. Ondai áńgimeni tileýles jurt ýaiymdap aitsa, mysyqtileý adamdar ádeii aitady. Onyń bárin tyńdai berseń, jumysty kim isteidi?» dedi. Sondyqtan osyndai ár sózge kóńil bóle bermeiik», - dedi Dáýren Abaev.
