Bizdiń basty kemshiligimiz – ózekti de názik dini máselelerdiń shalǵai eldi-mekenderdiń turǵyndaryna, halyqtyń uiymdaspaǵan toptaryna jetpeýi. Bul týraly búgin elordada ótken III respýblikalyq imamdar forýmynda sóz sóilegen Aqparat jáne qoǵamdyq damý ministri Dáýren Abaev málimdedi. Ministr din salasyndaǵy túiitkildi 5 máseleniń mánisin túsindirip qana qoimai, onyń sheshimin usyndy.
"Dástúrli dindi qaitarý jumystaryn kúsheitý qajet. Túsindirý jumystaryndaǵy bizdiń basty kemshiligimiz – din salasynyń óte ózekti de názik máseleleriniń shalǵai eldi-mekenderdiń turǵyndaryna, halyqtyń uiymdaspaǵan toptaryna jetpeýi. Osy máselege erekshe mán berýimiz qajet. Osy tusta barlyq óńirlerdegi imamdardy halyqqa nasihat jasaý kezinde qoǵamdaǵy ótkir máselelerge toqtalyp, keleńsiz jaǵdailardyń aldyn alýǵa baǵyttalǵan ýaǵyzdar júrgizýge shaqyramyn", - dedi Dáýren Abaev.
Ministr "Rýhani qundylyqtar – qoǵam birliginiń negizi" atty rýhaniiat ókilderi bas qosqan alqaly jiynda 5 negizgi máselege jiti toqtalyp, olardy naqty qalai sheshý joldaryn túsindirip berdi.
Abaev Elbasynyń "Rýhani jańǵyrý" baǵdarlamasynyń ózegi sanalatyn pragmatikalyq kózqarasqa buqarany tárbieleýge imamdardyń óz úlesterin qosýyn surady. Onyń aitýynsha, ýaǵyz aitýmen qatar halyqty ysyrapshyldyq pen orynsyz sán-saltanattan tyiylýǵa, jastarymyzdyń nekeni saqtaýǵa, azamattardy salamatty ómir saltyn ustaýǵa shaqyrǵan jón.
Osy rette aýyldardaǵy meshit imamdaryna materialdyq járdem berý máselesi qarastyrylyp jatqanyn habarlady. Kúrdeli túitkildi sheshýge birshama ýaqyt ketedi. Dese de, bul suraqtyń ońtaily sheshilýine bar kúsh-jigerin salatynyn aitty.
"Ekinshiden, meshitterdiń qyzmetin retteýdi jańdandyrý qajet. Aimaqtarda meshitter kommýnaldyq-sharýashylyq máseleleri tolyq sheshilgende ǵana paidalanýǵa berilýi kerek dep sanaimyz. Meshitti ashqan jergilikti metsenattar men demeýshiler bastapqy ýaqytta dini ǵimarattyń shyǵyndaryn óz qamqorlyǵyna alýǵa shaqyrýlaryńyzdy suraimyn. Dinimiz boiynsha saýapty is jasaý tek qana meshit salýmen shektelmeidi. Árine, qajettilik bar jerde meshit salý kerek. Alaida, meshit jetkilikti bolsa, qaiyrymdy azamattar men metsenattardy mektep, aýrýhana, jol, kópir siiaqty halyq kóp jyldar boiy igiligin kóretin, saýaby orasań zor igi isterge kóptep úndeýdi usynamyn", - dedi ol.
Sonymen qatar, Dini basqarma qyzmetkerleriniń bilimi men biliktiligin arttyrý jóninde de sóz qozǵady.
Búginde memleket imamdarǵa qoldaý kórsetý maqsatynda jyl saiyn dini basqarmanyń qyzmetshilerin oqytyp keledi. Bul jumys jalǵasyn tappaq. Meshit imamdarynyń tapshylyǵyn sheshý maqsatynda Nur-Múbarak ýniversitinde islamtaný mamandyǵyna granttardyń kóptep bólinýine kómek kórsetiletin bolady.
"Kelesi bir mańyzdy másele bar. Halyqtyń janazadan shyǵarý siiaqty dini rásimderdiń tóńireginde keibir moldalardyń jumysyna kóńili tolmaidy. Sondyqtan Dini basqarma imamdardyń jańa obrazyn qalyptastyrý kerek dep esepteimin. Halyq imamdardy qaiyrymdylyq sharalaryna muryndyq bolatyn, qaiǵysy men qýanyshyn bólisetin qaiyrymdy jandar sipatynda tanyǵan jón. Sebebi, istiń sózge qaraǵanda áseri – kúshtirek", - dep shegelep aitty Abaev.
Budan bólek, Dáýren Abaev óz sózinde turyp, jurtshylyqqa bergen ýádesin oryndaǵanyn aitty.
"Kezdesýlerimizdiń birinde Ózderińizge din taqyrybynda televiziialyq baǵdarlama ashýǵa ýáde bergen edik. Bizdiń ministrlik tarapynan sol ýádeni oryndap, qazir "Qazaqstan" ulttyq aransy men "Habar" telearnalarynan "Iman ózegi" syndy baǵdarlamalar ashyldy. Elbasy men Memleket basshysy Qasym-Jomart Kemeluly din máselesine airyqsha nazar aýdarýda. Sondyqtan da bul jolda birlesip, tabandylyqpen jumys isteitinimizge senemin. Barshańyzǵa Allanyń meiirimi men amandyǵy bolsyn", - dep óz sózin túiindedi.
Din salasyndaǵy eń kókeikesti túitkilderdi tarqatyp aitqan Úkimet ókili dini basqarmanyń áleýmettik jeli men BAQ betterindegi aǵartýshylyq jumystaryn kúsheitý kerektigin de atap ótti.
Jaǵymdy jańalyqtardyń biri – jýyrda jeke azamattardyń ótinishine ashyq ári jedel túrde jaýap qatý maqsatynda virtýaldy qabyldaý bólmesi ashylady. Bul azamattarǵa teris málimetterdi emes, Qazaqstan músylmandary dini basqarmasymen tekserilgen durys ári shynaiy aqparat alýǵa múmkindik beredi. Bul bastamany júzege asyrýǵa Abaev ózi basqaryp otyrǵan ministrlik belsendi túrde atsalysatynyn jetkizdi.
