Búgin Senattyń jalpy otyrysynda QR Aqparat jáne kommýnikatsiialar ministri Dáýren Abaev «Otaý TV» jelisiniń shyǵyny kóp ekenin aitty. Sondai-aq, ministr atalǵan tsifrlyq televidenieniń satylatyny týraly málimetti joqqa shyǵardy, dep habarlaidy Baq.kz tilshisi.
Otyrysta senator Dariǵa Nazarbaeva Dáýren Abaevtan «Otaý TV» spýtniktik televideniesine qatysty jaǵdaidy surady.
«Jaqynda ǵana bizdiń komitet «Otaý TV» máselesi boiynsha saýal joldady. Biz áli jaýap alǵan joqpyz. Sondyqtan, menińshe, jaýapty osy jerde ózińizden estigen durys bolar» - dedi Nazarbaeva Abaevqa.
Al, ministr «Otaý TV»-men bailanysty barlyq máselelerdiń muqiiat zerttelgenin aitty. Onyń málimetinshe, 130-ǵa jýyq arna, onyń ishinde tanymal sheteldik arnalardy biriktirgen «Otaý TV» jelisiniń shyǵyny kóp.
«Sheteldik teleónimder úshin dollarmen tóleý kerek. Al kelisimsharttardyń barlyǵy devalvatsiiaǵa deiin bekitilgen. Qazir 2016 jyldyń nátijesi boiynsha «Qazteleradionyń» jalpy shyǵyny 500 mln teńgege jetti. Olardyń 60-70% - «Otaý TV» jelisiniń aqyly kontenti. Al, aqyly kontent 70 myń adamǵa jýyqtaidy», - dedi Dáýren Abaev.
Degenmen, ministr «Otaý TV» paketterin satý jáne berý máselesi kún tártibinde joq ekenin aitty.
