QR Aqparat jáne qoǵamdyq damý ministri Dáýren Abaev Almatyda ótken azamattyq qoǵammen kezdesýde «Qazaqstan Respýblikasynda beibit jinalystar, mitingiler, sherýler, piketter jáne demonstratsiialar uiymdastyrý men ótkizý tártibi týraly» zańy týraly aitty, dep habarlaidy QazAqparat.
«Men birinshi kezekte bul jerge sizderdi tyńdaý úshin keldim. Sosyn suraqtaryńyzǵa jaýap berip, pikirlerińizdi tyńdaǵym keldi. Eki sózben aitqanda, 1995 jyly qabyldanǵan zańǵa ózgeris engizsek pe dep oiladyq. Biraq, talqylaý men taldaý kezinde ózgeris engizgenshe jańa zań qabyldaǵan durys ekendigi anyqtaldy. Naqty ózgeris engizý múmkin bolmai shyqty. Jańa kontseptýaldy zań qabyldaý kerek», - dedi Dáýren Abaev «Qazaqstan Respýblikasynda beibit jinalystar, mitingiler, sherýler, piketter jáne demonstratsiialar uiymdastyrý men ótkizý tártibi týraly» zańyn talqylaý kezinde.
Ministr jańa zańnyń kúshti tustaryn da tilge tiek etti.
Onyń aitýynsha, jańa zańda uiymdastyrýshylardyń, jýrnalister men qatysýshylardyń quqyǵy men mindetteriniń mártebesi aiqyndalǵan, memlekettik organdardyń ýákilettiligi bekitilgen, miting ótetin arnaiy oryndar belgilengen. Miting ótkizý tártibin habarlandyrý erejesi engizilgen. Ótinishterdi qaraý tetigi naqtylanǵan.
«Bizdiń aitpaq bolǵan barlyq novellamyz jaily sizder bilesizder. Osy arada otyrǵan áriptesterimizdiń kópshiligi bul zańnyń óte salmaqty ekendigimen kelisedi. Beibit jinalystar týraly jańa ózgerister engiziledi», - dedi ministr.
