Abaev: Áleýmettik jeliden alynǵan talai aqparat tekserilmei jariialanyp jatyr

BAQ qyzmetin úilestiretin zań jobasy QR Parlament Májilisiniń qaraýyna tapsyryldy, - dep habarlaidy kaz.tengrinews.kz tilshisi. 

"Ashyq dialog" telejobasy kezinde aqparat jáne kommýnikatsiialar ministri Dáýren Abaev jańa zań qabyldanǵan jaǵdaida BAQ ókilderiniń qyzmetinde qandai ózgeshelikter bolatynyn aityp berdi.  

"Buqaralyq aqparat quraladry týraly" zań jobasyna 250 túzetý engizilgen. Mańyzdy ózgeristerge ushyraǵan úsh sala: buqaralyq aqparat quraldary, aqparattandyrý jáne bailanys. 

Ministrdiń túsindirýi boiynsha, jýrnalist materialdy jariialamas buryn adamnyń jeke málimetterin qoldaný úshin odan ruqsat suraýy kerek bolady.

"Ruqsat alý - bul norma. Biz ony saqtadyq ta, naqtyladyq. Jazbasha ruqsat alýdyń qajeti joq. Diktofonǵa aitylsa da bolǵany. Jeke málimetter álem boiynsha qorǵalǵan. Bul qalypty tájiribe", - deidi Abaev.

Sonymen qatar, resmi habarlama, naqtylyǵyn tekserý, memlekettik organnyń resmi ókili siiaqty túsinikter engiziledi. Zorlyq-zombylyq kórgen balalardyń sýretin jariialaýǵa tyiym salynady. 

"Jýrnalist aqparattyń rastyǵyn tekserý úshin birneshe amal jasaý kerek. Mysaly, qazir áleýmettik jelilerden alynǵan kóptegen aqparat tekserilmei jariialana beredi. Bizdiń oiymyzsha, aqparatty jariialamas buryn ony naqtylap alý kerek", - deidi ministr.

"Buqaralyq aqparat quraldary týraly" zańnyń ataýy da ózgerýi múmkin. Ministrdiń aitýynsha, bul eskirgen túsinik, ol bilik pen qoǵamnyń birjaqty ǵana qatynasyn bildiredi. Jalpy kommýnikatsiia týraly zań týraly oilaý kerek.