Ákimdikter men jumyspen qamtý ortalyqtarynda adamdardyń kóptep jinalýyn boldyrmaý maqsatynda ataýly áleýmettik kómek (budan ári – AÁK) proaktivti formatta taǵaiyndalatyn bolady. Shara koronavirýstyń taralýyna jol bermeý úshin engiziledi. Bul týraly "Ult aqparat" Eńbek ministrliginiń baspasóz qyzmetine silteme jasap habarlaidy.
Birinshi kezekte járdemaqy quramy, turatyn mekenjaiy jáne tabys deńgeii ózgermegen otbasylarǵa taǵaiyndalady. Áleýmettik kómekti qaita taǵaiyndaý úshin derekterdi tekserý júrgiziledi, atap aitqanda turǵylyqty jeri boiynsha tirkelý (tirkeý), jyljymaityn múliktiń, kóliktiń bolýy , tabysy jáne t. b. tekseriledi. Otbasy quramy ózgermegen jaǵdaida ótinishter qolda bar derekter negizinde qalyptastyrylady. Barlyq aqparat, sondai-aq habarlamalar elektrondyq poshta jáne messendjerler arqyly jiberiletin bolady.
Aǵymdaǵy jyldyń basynan beri AÁK alýshylar 102,4 myń otbasy nemese 527,6 myń adam boldy.
Óńirlerde 2,6 myńnan astam ýchaskelik komissiia jumys isteidi. Olardyń málimetteri boiynsha, AÁK alýshylardyń 41,5%-yn kópbalaly otbasylar quraidy.
Osyǵan uqsas shema boiynsha shartty áleýmettik kómekti taǵaiyndaý kózdelgen. Eger áleýmettik kómek alýshynyń mártebesi ózgermese, jeke josparda 2020 jylǵy 1-toqsanymen uqsas sharalar kórsetiledi. Barlyq habarlamalar elektrondyq túrde jiberiletin bolady.
Esterińizge sala keteiik, ótken jyldyń jeltoqsan aiynda 1,5 mln qazaqstandyqqa proaktivti formatta kópbalaly otbasylarǵa arnalǵan jańa memlekettik járdemaqy taǵaiyndalǵan bolatyn. Azamattar tólemdi 2020 jyldyń qańtar aiynyń basynda aldy.
Buǵan deiin habarlanǵandai, QR Eńbek jáne halyqty áleýmettik qorǵaý ministrligi qazaqstandyqtarǵa birqatar qyzmetterdi alýǵa onlain-ótinish berý múmkindigin usyndy. Mysaly, jasyna bailanysty zeinetaqy tólemderin, memlekettik bazalyq zeinetaqy tólemin, júktilikke jáne bosanýǵa bailanysty tabysynan aiyrylǵan jaǵdaida tólenetin áleýmettik tólemderdi, jergilikti ókiletti organdardyń sheshimderi boiynsha muqtaj azamattardyń jekelegen sanattaryna áleýmettik kómekti taǵaiyndaý jáne t.b. ótinishterdi onlain-berý tetigimen tolyǵyraq myna jerden tanysýǵa bolady
