egov.kz portalynda «Memlekettik ataýly áleýmettik kómekti taǵaiyndaý jáne tóleý qaǵidalaryn bekitý týraly» Qazaqstan Respýblikasy Densaýlyq saqtaý jáne áleýmettik damý ministriniń buiryǵyna engiziletin ózgerister talqylaýǵa shyǵaryldy, dep habarlaidy "Ult aqparat".
«Ataýly áleýmettik kómekti alý maqsatynda ótinish berýshiniń jalǵan aqparatty jáne (nemese) durys emes málimetter kórsetken faktiler men derekter anyqtalǵan jaǵdaida, ortalyq nemese ákim aýyldyq jerde tiisti faktiler nemese málimetter anyqtalǵan kúnnen bastap bir jumys kúni ishinde ýákiletti organdy jazbasha túrde habardar etedi», - delingen qujatta.
Qujatta artyǵymen tólengen nemese negizsiz tólengen somalar týraly faktiler belgilengen kúnnen bastap bir jumys kúni ishinde ýákiletti organ ataýly áleýmettik kómek alýshyǵa aqshany erikti túrde qaitarý týraly jazbasha habarlama jiberedi. Habarlama jiberilgen kúnnen bastap AÁK-ni tóleý toqtatylady.
Ataýly áleýmettik kómekti artyǵymen nemese negizsiz alǵan azamat ony habarlama jiberilgen kúnnen bastap bir ai ishinde qaitarmasa, ýákiletti organ atalǵan somany qaitarý boiynsha sot tártibimen sharalar qabyldaidy. Sotqa aryz ataýly áleýmettik kómek alýshynyń turǵylyqty jeri boiynsha Qazaqstan Respýblikasynyń Azamattyq protsestik kodeksinde kózdelgen tártippen beriledi.
2019 jylǵy 15 tamyzdaǵy derekterge sáikes, ataýly áleýmettik kómekpen 1,8 mln qazaqstandyq qamtylǵan. Áleýmettik tólem alatyn turǵyndary kóp óńir Túrkistan oblysy - 498,7 myń adam. Almaty oblysynda 225,4 myń, Shymkent qalasynda 216,3 myń adam alady. Áleýettik kómek alýshylardyń shamamen 42 paiyzy qala, al 58 paiyzy aýyl turǵyndary. 1 tamyzdaǵy derekke sáikes, tólengen ataýly áleýmettik kómek somasy 103 mlrd teńge. Bir otbasyǵa beriletin tólemniń ortasha kólemi aiyna 86 myń teńgeni quraidy.
