Almatydaǵy Ortalyq klinikalyq aýrýhananyń dárigerleri 9-qabattan qulaǵan 17 jastaǵy qyzdyń ómirin saqtap qaldy, dep habarlaidy ult.kz.
Jasóspirim aýrýhanaǵa asa aýyr jaǵdaida jetkizilgen. Dárigerler oǵan II dárejeli koma, travmalyq jáne gemorragiialyq shok, aiaq-qoldarynyń, omyrtqasy men jambasynyń kóptegen synyqtary, sondai-aq keýde qýysynyń aýyr jaraqattaryn diagnostikalaǵan.
Eń kúrdeli zaqymdardyń biri – diafragmanyń jyrtylýy bolǵan. Sonyń saldarynan asqazan, kókbaýyr jáne ishektiń bir bóligi keýde qýysyna yǵysqan.
Naýqastyń ómirin saqtap qalý úshin hirýrgter shuǵyl túrde kúrdeli ota jasap, ishki aǵzalar men aýyr jaraqattardy qalpyna keltirgen. Otadan keiin qyz 12 táýlik boiy jansaqtaý bóliminde em qabyldady.
Keiin súiek pen býyndardy qalpyna keltirýge baǵyttalǵan taǵy tórt operatsiia jasaldy. Jalpy emdeý jáne qalpyna keltirýdiń aýrýhanadaǵy kezeńi 58 kúnge sozylǵan.
Qazirgi ýaqytta qyz aýrýhanadan shyǵarylyp, ońaltý kýrsynan ótip jatyr.
