QR Memlekettik qyzmet isteri agenttiginiń Memlekettik qyzmet departamenti direktorynyń orynbasary Dýman Ábilov osy jyldyń 9 naýryzynda qazaqstandyqtardyń jumys isteitindigin nemese demalatyndyǵyna qatysty túsinik berdi, dep habarlaidy "Ult aqparat".
«Ózderińiz de bilesizder, mereke kúni jeksenbige tuspa-tus kelse, onda dúisenbi kúni memlekettik qyzmetshiler úshin jumys kúni bolýy tiistigi týraly tapsyrma keshe ǵana boldy. Merekeler týraly zańǵa sáikes, eger demalys mereke kúnine týra kelse, onda ol kelesi jumys kúnine aýysady. Biraq, bul zań tek memlekettik qyzmetshilerge ǵana emes, bárine birdei», - dedi ol BAQ ókilderiniń saýalyna orai.
Onyń atap ótýinshe, qazirgi ýaqytta QR Premer-Ministriniń Keńsesinde bul máselege qatysty biryńǵai ádis ázirleý úshin múddeli memlekettik organdardyń qatysýymen jiyn ótip jatyr.
«Óz tarapymnan munyń quqyq qorǵaý jáne arnaýly organdar úshin ǵana aitylýy múmkin ekendigin atap óte alamyn. Bul memlekettik qyzmetshilerdiń jekelegen sanattaryna qatysty bolýy yqtimal», - dedi Dýman Ábilov.
Osy oraida ol biylǵy jyldyń 9 naýryzynda qazaqstandyqtar demalady dep boljaityndyǵyn basa aitty.
«Memlekettik qyzmetshiler jumys isteýi úshin aldymen, Merekeler týraly zańǵa ózgertýler engizý qajet», - dedi departament direktorynyń orynbasary.
Aita keteiik, Memleket basshysy Qasym-Jomart Toqaev mereke kúnderine qatysty qoldanystaǵy tártipti qaita qaraýdy tapsyrǵan bolatyn.
«Úkimetke jáne Prezident Ákimshiligine mereke kúnderine qatysty qoldanystaǵy tártipti qaita qaraýdy tapsyrdym. Eger meiram kúni jeksenbige sáikes kelse, kelesi kún demalys bolyp sanalady. Kelesi kún (dúisenbi) barlyq memlekettik qyzmetshiler úshin jumys kúni bolýy tiis», - dep jazǵan edi Qazaqstan Prezidenti Twitter-degi paraqshasynda.
