23 maýsym – Memlekettik qyzmetshiler kúni. Bul kún memlekettik basqarý júiesinde eńbek etip júrgen myńdaǵan mamannyń kásibi merekesi. Qoǵamda memlekettik qyzmet týraly túrli pikir qalyptasqanymen, resmi statistika bul salanyń qazirgi kelbetin basqa qyrynan kórsetedi, dep habarlaidy ult.kz.
Búginde Qazaqstanda 84 myńnan astam memlekettik qyzmetshi jumys isteidi. Olar ministrlikter men ákimdikterde, aýdandyq bólimder men aýyldyq okrýgterde, túrli memlekettik organdarda eldiń áleýmettik-ekonomikalyq damýyna qatysty sheshimderdi ázirleýge jáne iske asyrýǵa qatysady.
Statistikaǵa súiensek, qazaqstandyq memlekettik qyzmetshiniń ortasha jasy – 40 jas. Bul memlekettik apparatta tájiribeli mamandarmen qatar jas kadrlardyń da belsendi jumys istep jatqanyn ańǵartady. Qyzmetkerlerdiń úshten birinen astamyn jastar quraidy.
Qazirgi memlekettik qyzmettiń taǵy bir ereksheligi – áielderdiń belsendiligi. QR Mádeniet jáne aqparat ministrliginiń derekteri boiynsha, memlekettik qyzmetshilerdiń 55 paiyzdan astamy áielder. Iaǵni búgingi tańda árbir ekinshi memlekettik qyzmetshi – áiel adam. Onyń ústine áielder tek oryndaýshy qyzmetterde ǵana emes, basqarýshy laýazymdarda da eńbek etip júr. El boiynsha basshylyq qyzmetterdiń shamamen 39 paiyzyn áielder atqarady.
Sońǵy jyldary memlekettik qyzmet júiesinde jas basshylardyń qatary da kóbeiip keledi. Mysaly, Qazaqstandaǵy eń jas ákimderdiń biri nebári 27 jasynda aýyldyq okrýgti basqarýǵa kirisken.
Memlekettik qyzmettiń basty erekshelikteriniń biri – turaqtylyq pen tájiribe sabaqtastyǵy. Qyzmetkerlerdiń ortasha eńbek ótili 12 jyldy quraidy. Al keibir mamandar bul salaǵa búkil ǵumyryn arnap, 30-40 jyldan astam ýaqyt boiy memleket qyzmetinde eńbek etip keledi. Osyndai tájiribeli kadrlar jas mamandarǵa baǵyt-baǵdar berip, memlekettik basqarý júiesindegi kásibi mádeniettiń saqtalýyna úles qosýda.
Sońǵy jyldary memlekettik apparatty jańǵyrtýǵa erekshe kóńil bólinip keledi. Qaǵaz qujat ainalymy qysqaryp, kóptegen qyzmetter tsifrlyq formatqa kóshirildi. Elektrondy úkimet, onlain qyzmet kórsetý júieleri jáne jasandy intellekt elementterin engizý memlekettik qyzmettiń tiimdiligin arttyrýǵa baǵyttalǵan.
Árine, memlekettik qyzmet – syrt kózge kórine bermeitin jaýapkershiligi joǵary sala. Kún saiyn myńdaǵan maman azamattardyń ótinishterin qarap, memlekettik baǵdarlamalardy iske asyryp, óńirlerdiń damýyna qatysty máselelerdi sheshýmen ainalysady.
23 maýsym – osy eńbektiń baǵalanatyn kúni. Memlekettik qyzmetshiler kúni qoǵam men memleket arasyndaǵy bailanysty nyǵaityp júrgen mamandardyń eńbegine qurmet kórsetýdiń taǵy bir múmkindigi bolyp tabylady.
