Ishki ister ministrliginiń uiymdasqan qylmysqa qarsy kúres jáne ózindik qaýipsizdik jónindegi bólimsheleri Almaty qalasynyń halyqaralyq áýejaiy arqyly Birikken Arab Ámirlikterine baǵaly metaldardy zańsyz áketýdi júzege asyrmaq bolǵan qylmystyq top qyzmetiniń jolyn kesti, – dep habarlaidy Polisia.kz.
Kontrabanda memlekettik baqylaýdy ainalyp ótip, kólik politsiiasynyń laýazymdy tulǵalaryna para berý arqyly júzege asyrylǵan.
"Almaty qalasynyń halyqaralyq áýejaiynda Kóliktegi politsiia departamentiniń Uiymdasqan qylmysqa qarsy kúres basqarmasynyń qyzmetkerine kedendik jáne shekaralyq baqylaý aimaǵy arqyly “sálemdemeni” alyp ótýi úshin 600 AQSh dollary somasynda para berý áreketi kezinde Qazaqstan Respýblikasynyń azamaty ustaldy. Jeke tekserý barysynda odan 1200 AQSh dollary tárkilendi.
Jedel-izdestirý sharalaryn júrgizý nátijesinde áýejai ǵimaratynda QHR azamaty ustaldy, ol kúdiktiniń sybailasy bola otyryp, altyndy áýe arqyly Almatydan Dýbaiǵa jetkizýi kerek bolǵan. Politsiia qyzmetkerleri onyń sómkesinen salmaǵy 3 kg 200 gr. bolatyn altyn quimalaryn tapty. Quny shamamen 84 mln teńgeden asady" - delingen habarlamada.
Tergeý sotynyń sanktsiiasymen qazaqstandyq kúdiktiniń turǵylyqty jeri boiynsha Almatydaǵy kottedjderdiń birinde tintý júrgizilip, quimalardaǵy altyn men metaldyń mólsherin anyqtaityn elektrondyq tarazy men arnaiy qurylǵylar tárkilengen.
Qazirgi ýaqytta kúdiktilerdi ýaqytsha ustaý izoliatoryna qamaý týraly másele sheshilip jatyr. Tergeý qymbat metaldyń shyǵý kózin jáne qylmystyq toptyń basqa da sybailastaryn anyqtaýda.
