Qazaqstanda meditsinalyq qyzmetkerlerdiń 30 paiyzy nemese 820 adam COVID-19 infektsiiasyn juqtyrǵan, dep habarlaidy "Ult aqparat".
Bul týraly QR DSM Taýarlar men qyzmetterdiń qaýipsizdigi men sapasyn baqylaý komitetiniń tóraǵasy Timýr Sultanǵaziev aitty.
«Meditsinalyq qyzmetkerlerdiń 30 paiyzy nemese 820 adam COVID-19 infektsiiasyn juqtyrǵan. Ásirese, ortasha jáne kishi meditsinalyq qyzmetkerler kóbirek aýyrǵan. Bir qyzyǵy, virýs juqtyrǵandar arasynda infektsiialyq statsionardyń qyzmetkerleri az» - dep atap ótti Sultanǵaziev facebook jelisinde ótken onlain brifingte.
Ministrlik ókiliniń sózinshe, Qazaqstanda infektsiianyń taraýy 4,5-8 paiyzdy quraidy.
"Elde virýstyń taraýy geometriialyq progressiiamen ósip kele jatqan joq. Infektsiianyń taraýy turaqtalyp, boljaǵanymyzdai ósip keledi" dedi ol.
Sonymen birge, spiker infektsiialyq statsionarǵa qaraǵanda ádettegi emhana men aýrýhana qyzmetkerleriniń jii aýyratynyn aitty.
«Juqpaly aýrýlar aýrýhanasynda mamandar jeke qorǵanys quraldarymen júredi jáne infraqurylymnyń ózi «taza» jáne «las» aýmaqtarǵa bólý múmkindik beredi. Al emhanalar men kópbeiindi aýrýhanalarda mundai bólý qiynǵa soǵady. Onyń ústine kelýshiler sany kóp, olardan virýs juqtyrý yqtimaldyǵy da artady. Táýlik boiy ǵimarattaǵy meditsinalyq mamandar yqtimal naýqastarmen bir aýany jutýǵa májbúr», - dedi T. Sultanǵaziev.
27 sáýir 16.00-degi málimetke sai, Qazaqstanda 2791 adamnan koronavirýs anyqtaldy. 696 adam dertten aiyqty. 25 adam qaitys boldy. Ministrliktiń dereginshe, elde virýs juqtyrǵandarmen bailanysta bolǵan 47893 adam anyqtalyp, olardyń 98,5 paiyzy oqshaýlanǵan.
Qazaqstan Prezidenti Qasym-Jomart Toqaev eldegi tótenshe jaǵdaidy 11 mamyrǵa deiin sozdy.
