Elordada volonterlerdiń «Birgemiz» respýblikalyq front-keńsesiniń ashylý saltanatyna Qaraǵandy oblysynyń Temirtaý qalasynan 80 jastaǵy volonter Birlikbai Ordabai qatysty. «Júrgen ortamnyń jaqsy da jaily bolǵanyn qalaimyn», deidi QazAqparat tilshisimen áńgime barysynda aqsaqal.
«Ózim metallýrgpyn. Eriktiler qataryna óz yntammen, eshqandai aqysyz qaiyrymdylyq kózqarasymmen enip otyrmyn. Óitkeni, jaqsylyqtyń shapaǵatyn shashyp, júrgen ortamyzdyń jaqsy bolýyn qalaimyn. Ortam jaqsy bolsa meniń de jaǵdaiym jaily degen sóz. Temirtaýdan birneshe erikti keldik. Bizdiń baǵytymyz – áleýmettik sipat. Qalamyzda ardagerler uiymy, zeinetke shyqqan 29 myń adam bar. Olardyń ishinde Ekinshi dúniejúzilik soǵystyń 12 ardageri bar. Ardagerlerimizdiń eń jasy – 94-ke keldi. Olarǵa árdaiym qamqorlyq kórsetemiz. Soǵys kezindegi tyl eńbekkerleriniń sany – 1600. Olardyń eń jasy – 84-te. Biz kóbinese solardyń jaǵdaiyn oilap, kómek qolyn sozamyz», - dedi qart volonter Memleket basshysynyń qatysýymen ótken jiynda.
Volonter qarttar quqyǵynyń qorǵalýyna barynsha nazar aýdarady eken.
«Soǵys kezinde Leningrad blokadasynda qalǵan búginde kózi tiri bes adamymyz bar. Fashistik lagerlerde bolǵan 15 tutqyn da qatarymyzda. Barlyǵy bizdiń tizimde. Ókinishke qarai, qarttarymyzdyń sany sirep bara jatyr. Eńbek ardagerlerin qatarymyzǵa qosyp, qoǵamdyq jumysqa tartyp jatyrmyz. Biyl Volonterler jyly men Jeńistiń 75 jyldyǵy tuspa-tus kelip otyr eken. Bizdiń oiymyzsha, elimizde Ardagerler týraly zań qabyldanýy kerek. Ardagerdi tek soǵysqa qatysýshy retinde eseptemeiik. Eńbek ardagerleri de qatarymyzda qanshama. Jalpy, qoǵamnyń ómir jasy uzaryp keledi. Qarttardyń ómir jasy uzaq bolýy úshin belsendilik tanytyp, óz erkimen eldiń damýyna úles qosýy tiis», - deidi ol.
Qart volonter qazaqtyń «atadan mal qalǵansha, tal qalsyn» degen sózin eske saldy.
«Byltyr Eýropaǵa barǵanymda búkil qurlyqtyń orman ishinde ekenine kózim jetti. Sol ormannyń 80 paiyzy qolmen otyrǵyzylypty. Demek Qazaqstanda da biz aǵashty kóp otyrǵyzýymyz kerek», - dedi ol.
Aita ketsek, búgin Prezident Qasym-Jomart Toqaev elordada EKSPO kórmesiniń «Art Hub» pavilonynda ornalasqan volonterlerdiń «Birgemiz» respýblikalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa ainalatyn bolady. Sondai-aq, ol volonterlik jobalar men oqytý baǵdarlamalaryn úilestirý, monitoring jasaý, volonterlikti ilgeriletý boiynsha biryńǵai aqparattyq saiasatty júrgizedi jáne biryńǵai Call-ortalyqtyń jumysyn uiymdastyrady.
.jpeg)