9 qarashada elordada "Qazaqstan" ortalyq kontsert zalynda Máńgilik El Daýysy (Máńgilik el daýysy) atty ulttyq mýzykalyq shoýy ótedi. Bul sharada Erke Esmahan, Aiqyn, Erbolat Qudaibergen, Nurjan Kermenbaev, Mádina Sádýaqasova, ORDA jáne Raim&Artur toptary óner kórsetedi.
Memlekettik satyp alý veb-portalynda Nur-Sultan qalasynyń Mádeniet jáne sport basqarmasy "Máńgilik El Daýysy Ulttyq mýzykalyq patriottyq joba" mádeni is-sharasyn daiyndaý jáne ótkizý boiynsha qyzmetterge tapsyrys bergen. Basqarma "Pantograph" jaýapkershiligi shekteýli seriktestigimen shart jasasqan. Shart veb-portalǵa 23 qyrkúiekte jariialanǵan. 2 qazan kúni eki tarap shartty tikelei jasaý arqyly bir kózden satyp alý tásilimen 80 mln teńgege (qosymsha qun salyǵyn eskerýmen) kelisimge kelgen.
Bul joba "Áleýmettik mańyzy bar jáne mádeni is-sharalar ótkizý" biýdjettik baǵdarlamasynyń negizinde júzege asyrylmaq. Mádeniet jáne sport basqarmasy jariialaǵan sharttyń tehnikalyq sipattamasyn osy siltemege ótip, qarai alasyz.
Is-sharany 2019 jyldyń qyrkúiek-qarasha ailarynda Nur-Sultan qalasyndaǵy syiymdylyǵy 1000 orynnan kem emes kontserttik alańda ótkizý josparlanǵan. Shoý ótkeli otyrǵan "Qazaqstan" OKZ úlken zalyna 3500 adam syiyp ketedi.
Joba maqsatyna zer salsańyz, bul kontsert Elbasynyń "Uly Dalanyń Jeti qyry" maqalasy men "Rýhani Jańǵyrý" baǵdarlamasynda, sondai-aq Qazaqstandaǵy Jastar jylynyń negizgi maqsattaryna tujyrymdalǵan ideologiialyq vektorlarǵa sáikes keletin qazaqstandyq jastardyń boiyndaǵy patriotizm men Otanǵa degen súiispenshilikti, birlik pen jasampazdyqty qalyptastyrý, otbasylyq qundylyqtardy, ulttyq dástúrler men tózimdilikti saqtaý maqsatynda ótkiziledi.
Joba ideiasy – "Birge án sal". Mýzykalyq jobaǵa juldyzdarmen "súiikti ánderin birge aita alatyn" kórermender tikelei qatysady. Basqarma kórermen shoýdyń tolyqqandy qatysýshysy bolýy arqyly týǵan eliniń mádenietine úles qosa alady dep sanaidy. Is-sharanyń belgilengen tiziminde, iaǵni set-paraǵynda jastar úshin mádeni jáne tárbielik fýnktsiialary bar tanymal ánder paidalanylady. Osy oraida kontsertke shaqyrylǵan ánshilerdiń repertýaryn qarap shyqtyq.
Erke Esmahan "Ǵashyqpyn men qazaq ulyna" dep shyrqaityn "KZ jigit" degen áni, "Áieldiń baqyty – otbasy" degen joldary bar "Áiel baqyty" degen ánderin shyrqaýy múmkin.
Al Aiqynnyń "Týǵan jer ainaldym senen" dep bastalatyn "Týǵan jer" áni, dostyqty dáripteitin "Bir dosym kerek eken" áni set-paraqtan tabylyp qalady. "Men qazaqpyn", "Bizdiń jigitter", "Jaýynger" degen patriottyq ánderi bar Erbolat Qudaibergenniń jalǵyz ózi shoýdyń maqsatyn ashyp tur.
Nurjan Kermenbaevtyń "Qazaqtyń balasy" degen án týraly, "Qara bala", "Rahmet" degen motivatsiialyq, "Áke armany" degen ata-anany qurmetteýge arnalǵan ánderi bar.
Al Mádina Sádýaqasovanyń "Sarbazdar», "Almaty men Astana" atty patriottyq ánderi, aýyl týraly "Balapan qaz" áni, "Óz-ózińmen bol", "Armandar oryndalady" degen motivatsiialyq ánderi, ORDA tobynyń "Táýelsiz Qazaqstan" degen patriottyq, "Arman qusym", "Qaǵaz keme" jáne "Qily zaman" atty tárbielik ánderi bar. Raim&Artur-dyń "Sáýkele" degen áni ǵana tapsyrys berýshi talabyna sai keledi.
Hit ánderdiń mátinderi kórermenderge yńǵaily bolý úshin LED-ekrandarǵa shyǵarylady. Shoý ánurandy oryndaýmen aiaqtalady.
Is-sharaǵa qatysatyn tanymal mýzykalyq toptar men ártisterdiń árbir kontserttik nómirinde bi ujymy óner kórsetedi.
Tehnikalyq bólimde kontserttik alań shoý-tehnika salasyndaǵy eń zamanaýi qurylǵylarmen jabdyqtalady dep jazylǵan. Tapsyrys berýshiniń oiynsha mundai qural-jabdyqtar men mamandandyrylǵan tehnikalyq qyzmetkerlerdiń úilesimdi jumysy joba ideiasy men rýhyn tolyq jetkizýge múmkindik beretin kórinedi.
Qural-jabdyqtar:
- L-acoustics álemindegi №1 júielik massivter men sahnalyq monitorlar;
- YAMAHA CL5 jáne PM5DRH usynǵan basqarý konsolderi;
- DANTE zamanaýi kóp arnaly sandyq dybys taratý jelisi;
- PIONEER usynǵan zamanaýi DJ- qural-jabdyǵy;
- Fender, DW, NORD, AMPEG, MESSA jáne t.b. usynǵan sahnalyq qural-jabdyqtar;
- Led-displeilerdiń keń formatty júiesi;
- Tikelei efirdiń jyljymaly stýdiiasy;
- Audix, Shure, Sennheiser, AKG, Beyerdynamic mikrofondary;
- CLAY PAKY brendiniń jaryqtandyrý jabdyqtary;
- Layher usynǵan sahnalyq konstrýktsiialar.
Festivaldar men kontsertter ótkizýge mamandandyrylǵan tehnikalyq qyzmetkerlerdiń úilesimdi jumysy men qural-jabdyqtar Máńgilik El Daýysy mýzykalyq patriottyq jobasynyń ideiasy men rýhyn tolyq jetkizýge múmkindik beredi delingen.
Sondai-aq, barlyq qajetti mýzykalyq aspap pen ártisterdiń tehnikalyq raiderlaryna sáikes qosymsha jabdyqtar qamtamasyz etiledi. Jumys toby, iaǵni Pantograph prodiýserlik ortalyǵy is-sharany barlyq qajetti tehnikalyq jáne shyǵarmashylyq eńbek resýrstarymen qamtamasyz etetin jumys tobyn qurady. Qajet bolǵan jaǵdaida avtorlyq syiaqyny tóleýdi qamtamasyz etedi.
Is-shara aiaqtalǵan soń Pantograph 19 qarashaǵa deiin foto jáne beinematerialdardy elektrondyq túrde shyǵarmashylyq esep beredi.
Shoýdyń aqparattyq qoldaýshysy – Alash Media Group. "Tengriniýs", "Massaget" saittary kontsert jarnamasyn júrgizip jatyr.
Biletter 1000-5000 teńge aralyǵynda.
Óner kórsetetin ártisterdiń shyǵarmashylyǵy jastardyń boiyndaǵy patriotizm men otanǵa degen súiispenshilikti, birlik pen jasampazdyqty qalyptastyrýǵa, otbasylyq qundylyqtardy, ulttyq dástúrler men tózimdilikti saqtaýǵa sai kele me degen oi týady. Bir jyldary basqarma "TMD juldyzdarynyń qatysýymen" dep reseilik ánshilerdi merekelik sharalarǵa shaqyrýǵa asyq bolatyn. Sońǵy kezde bul úrdis saiabyrsydy.
Endi "Rýhani jańǵyrý" men jastar jylyn jeleýletip "Máńgilik el daýysy" degen patriottyq ulttyq mýzykalyq shoýyn ótkizbek. Qazaq estradasynyń qazirgi repertýary jastardyń patriottyq sezimin oiatyp, jastarǵa tárbie bere alady deýge sený qiyn. Mundai shara búgin ǵana ótkizilip otyrǵan joq. Biýdjeti jabyq memlekettik organdardyń pozitivti imidj qalyptastyrýdy kózdeitin is-sharalary týraly memlekettik satyp alý portalynan bilýge bolady.
Nazerke Abibýlla,
