Foto: inform.kz
Almaty oblysy Qarǵaly aýylyndaǵy jaǵdaidyń mán-jaiy belgili boldy. 8 jastaǵy qyz ony urlap áketken er adamnyń ne istegenin aityp berdi, dep habarlaidy "Ult aqparat" Almaty.tv-ge silteme jasap.
Belgisiz azamat qarshadai qyzdy aldymen qonaqúige aparǵan. Ol azdai, qushaqtap, taksi ishinde ersi áreketke barǵan. Munyń barlyǵyn qyz anasyna aityp beripti. Al búgin qonaqúi ákimshiligi «biz jóndeýge jabyldyq, jumys istemeimiz» dep otyr.
Jelige júktelgen beinejazbadan buryn kúdikti jol boiyndaǵy qonaqúige toqtap, bólme suraǵan. Dúkenge baryp, alańdaýly qyzdyń kóńilin de aýlai bastaǵan.
«Nur-Áli degen qonaqúige kirdik. Qonaqúi qyzmetkerine 2000 teńge berip edi, ol "bul aqsha tek 1 saǵatqa ǵana jetedi" dep almady. Keiin meni takside qushaqtap, betimnen súidi. Maǵan onyń bul áreketi unamady. Dúkenge toqtap, tátti sýsyn men kámpit taiaqshasyn alyp berdi. Júrgizýshi aǵaiǵa aitýǵa qoryqtym», – deidi qyz.
video: "Almaty" telearnasy
Jazǵy lagerge bara jatqan jetkinshekti jol boiynda taksi kútip turǵan jerden alyp ketken. 36 jastaǵy kúdikti jetkizip tastaimyn dep taksige otyrǵyzǵan kórinedi.
«Qyzdyń jaltańdap turǵanyn baiqadym. Aqyryn qyzben sóilesip úige alyp kirdim. Ekeýimiz qyzǵa talasyp qaldyq. Artymnan qalmai júrip aldy», – dedi kýáger Kúlásh Teńelbaeva.
Perzentim qurban bola jazdady degen anasy qazir del-sal kúide. "Mundai jaǵdaidy bastan keshemin dep oilamadym" dep jylap otyr. Únemi qyzyn ákesi jetektep jolǵa shyǵaryp salady eken, al keiin taksi áketedi.
«Tańerteń saǵat 9.00-ge taman shyǵyp ketken. Sodan júregim sezdi me, bilmeimin, habarlasa bastadym. Áli kelmedi dedi. Balalarmen oinap qalǵan shyǵar dep oiladym. Mundai jaǵdaidy eshkimniń basyna tilemeimin. Osyndai áreketke barǵan adam eń aýyr jazasyn alsyn», – deidi qyzdyń anasy Rimma Halmuratova.
«Atalǵan derek QR Qylmystyq kodeksiniń 125-baby boiynsha Jambyl aýdany politsiia bólimine tirkeldi. Jedel izdestirý barysynda 1987 jylǵy kúdikti anyqtalyp, ustaldy. Zańnamaǵa belgilengen tártippen ustalǵan adam qamaýǵa alyndy», – dedi PD baspasóz hatshysy Ernar Saidildin.
Kúdikti qazir adam urlaý faktisi boiynsha tergelip jatyr. Alaida jábirlenýshiniń anasy qyzyn zorlaýǵa oqtalǵan dep qorqady. Sondyqtan tergeýdiń mai-shammen qaralǵanyn qalaidy.
