Sinoptikter 8 sáýirge arnalǵan aýa raiy boljamyn jariialady, - dep habarlaidy "Ult aqparat" "Qazgidromet" ortalyǵyna silteme jasap.
Meteorologtardyń habarlaýynsha, erteń, 8 sáýirde atmosferalyq fronttardyń ótýine bailanysty Qazaqstannyń basym bóliginde jaýyn-shashyn, tek ońtústik-batysta kún ashyq bolady. Respýblikanyń kei jerlerinde tuman, kóktaiǵaq, jeldiń kúsheiýi, ońtústik-shyǵysynda naizaǵai kútiledi, burshaq jaýýy múmkin.
"Jambyl, Ońtústik Qazaqstan oblystarynyń kei jerinde jel kúsheiedi, túnde tuman túsedi. Qyzylorda oblysynyń kei jerlerinde tuman, jeldiń shańdy daýylmen kúsheiýi kútiledi. Almaty oblysynyń kei jerlerinde naizaǵai, burshaq bolýy múmkin, jeldiń jyldamdyǵy sekýndyna 15-20 metr bolady", - deidi mamandar.
Sonymen qatar, Aqmola, Qaraǵandy, Shyǵys Qazaqstan, kúndiz Soltústik Qazaqstan, Qostanai, Pavlodar oblystarynda jeldiń kúsheiýi, tuman, kóktaiǵaq kútiledi. Aqtóbe, kúndiz Batys Qazaqstan oblystarynyń kei jerlerinde jel kúsheiip, tuman túsedi. Mańǵystaý oblysynyń kei jerlerinde tuman, Atyraý oblysynyń kei jerlerinde jeldiń kúsheiýi kútiledi.
Eske sala keteiik, buǵan deiin sinoptikter elimizdiń ońtústiginde úsiktiń júretinin eskertti.
