QR Eńbek jáne halyqty áleýmettik qorǵaý vitse-ministri Aqmádi Sarbasov tótenshe jaǵdai kezinde kirisinen aiyrylǵan qansha adamǵa 42 500 teńge áleýmettik tólemi berilgendigin aitty, dep habarlaidy QazAqparat.
«Biz ótinish berý úderisin barynsha jeńildettik. Ol úshin ártúrli tehnikalyq sheshimder iske asyryldy: 42500.enbek.kz veb-portaly; «Elektrondyq úkimettiń» veb-portaly; 18 Telegram-bot; uialy telefon nómiri tirkelse, ótinim berýsiz. Bankterdegi uzyn-sonar kezektiń paida bolý qaýpin azaitý maqsatynda, bank derektemelerinsiz ótinish berý múmkindigi qarastyryldy. Esepshottardy onlain ashý boiynsha sharalar qabyldandy. Bul sharalardyń barlyǵy ótinishterdi berý jáne qaraý úderisin tezdetýge múmkindik berdi. Barlyǵy 8 million adam ótinish berdi, onyń 4,6 millionyna taǵaiyndaldy. Tótenshe jaǵdaidyń toqtatylýyna bailanysty 2020 jyldyń 11 mamyrynan bastap jańa ótinishterdi qabyldaý aiaqtaldy», - dedi Aqmádi Sarbasov Ortalyq kommýnikatsiialar qyzmetindegi brifing barysynda.
Vitse-ministrdiń aitýynsha, alǵash ret 194,2 mlrd teńge somasyndaǵy 4,6 mln tólem taǵaiyndaldy. Onyń ishinde birinshi aiǵa 158,9 mlrd teńge somasynda 3,7 mln, ekinshi aiǵa 35,4 mlrd teńgege 834 myń ótinish maquldandy. Ekinshi aida 2,9 million adamǵa tólem uzartylyp, 122,2 mlrd teńge tólendi.
«Biz buǵan deiin de aitqanymyzdai, jaldamaly qyzmetkerlerge áleýmettik járdemaqy taǵaiyndaýdyń basty sharty - bul aqysyz demalysta bolý jáne áleýmettik saqtandyrý júiesine qatysý ótili, al basqa sanattar úshin - tótenshe jaǵdai kezinde tolyq kiristen aiyrylý jáne áleýmettik saqtandyrý júiesine qatysý ótili boldy. Al azamattyq-quqyqtyq sipattaǵy sharttar boiynsha jumys isteitin azamattar úshin zeinetaqy jarnalarynyń bolýy suraldy», - dedi vitse-ministr.
