Mańǵystaý oblysynda Kaspii teńizine shomylýǵa baryp, joǵalyp ketken 18 jastaǵy bozbalany izdeý jumystary qaiǵyly aiaqtaldy. Qutqarýshylar onyń máiitin 8 kúnnen keiin tapty, dep habarlaidy ult.kz.
Oqiǵa 7 shilde kúni bolǵan. Jas jigit dostarymen birge teńizge shomylýǵa barǵan, alaida sol kúnnen keiin úiine oralmaǵan.
Mańǵystaý oblystyq tótenshe jaǵdailar departamentiniń málimetinshe, izdeý jumystary kezinde Aqtaý qalasynan 51 shaqyrym qashyqtyqtaǵy jaǵalaý mańynan bozbalanyń denesi tabylǵan.
«Búgin tótenshe jaǵdailar departamentiniń qyzmetkerleri jaǵalaý syzyǵynan shamamen 10 metr qashyqtyqta sýdan jasóspirimniń máiitin taýyp, jaǵaǵa shyǵardy», – dep habarlady qutqarýshylar.
Tabylǵan máiit keiin politsiia qyzmetkerlerine tapsyryldy. Oqiǵanyń mán-jaiyn tiisti organdar anyqtap jatyr.
