Biylǵy jyldyń 8 aiynda Qazaqstanǵa ákelinetin júkterdi tekserý kezinde ósimdikter karantini salasynda 2,7 myńnan astam zań buzýshylyq anyqtaldy, dep habarlaidy "Ult aqparat" QR Aýyl sharýashylyǵy ministrliginiń baspasóz qyzmetine silteme jasap.
Bapasóz qyzmetiniń málimetterine qaraǵanda, kóp jaǵdaida ósimdik ónimderin importtaýshylar taýarlardy mindetti fitosanitariialyq sertifikattarsyz alyp kelýge tyrysady. Sondai-aq, osyǵan deiin jalǵan nemese sáikes kelmeitin sertifikatpen, tyiym salynǵan jáne ziiankesteri bar ónimderdi elge kirgizý áreketteriniń kóptegen joly qiyldy.
Atalǵan faktiler boiynsha 2225 jeke jáne zańdy tulǵaǵa 110 879 243 teńge aiyppul salyndy. 720 jaǵdaida júk qaita jóneltýshi elge qaitaryldy (9992 tonna, 1259 m3 jáne 1 701 273 dana), 8 jaǵdaida ónim joiyldy, úsh jaǵdaida qaita óńdeldi.
Anyqtalǵan zań buzýshylyqtarǵa bailanysty eksporttaýshy elderge 477 notifikatsiia jiberildi, onyń ishinde 252 – Ózbekstan Respýblikasyna, 127 – Resei Federatsiiasyna, 38 – Iran Islam Respýblikasyna.
Qazirgi ýaqytta Qazaqstanda 77 syrtqy jáne ishki fitosanitariialyq baqylaý beketteri jumys isteidi. Onyń ishinde 32 beket respýblikanyń shekara mańyndaǵy óńirlerinde karantindik fitosanitariialyq baqylaýdy kúsheitý úshin sońǵy jyly ǵana ashylǵan.
«Memlekettik karantindik fitosanitariialyq baqylaý elge qaýipti karantindik obektilerdiń - ósimdikterdi zaqymdaityn ósimdik aýrýlarynyń qozdyrǵyshtaryn, jándikterdiń, kenelerdiń, nematodtardyń, sondai-aq aramshóp tuqymdarynyń memleket shekarasynan ótip ketpeýi úshin júzege asyrylady» - delingen habarlamada.
