Almatyda 78 adamdy aldaǵan alaiaqqa qatysty qylmystyq is aiaqtalyp, sotqa joldandy, dep habarlaidy "Ult aqparat".
Almaty qalasy Politsiia departamentiniń tergeý basqarmasy birqatar alaiaqtyq jasady degen kúdikke ilingen 29 jastaǵy M.esimdi er adamǵa qatysty qylmystyq isti aiaqtady.
«Sotqa deiingi tergeý barysynda kúdiktiniń OLX.kz saitynyń qoldanýshylaryna qatysty 78 aldaý faktisine qatysy bar ekendigi anyqtaldy. Fishing ádisin qoldana otyryp, OLX.kz saityna uqsas senimsiz siltemelerdi jiberip, kúdikti jábirlenýshilerge, egerde berilgen siltemeler boiynsha ózderiniń banktik málimetterin toltyrǵan jaǵdaida, taýarlar úshin tólem ala alasyńdar dep sendirgen. Kúdiktiniń aitýynsha, taýarlardy kýrerler alyp ketýi kerek bolǵan. Alaida jábirlenýshilerdiń kartalarynyń derekterin alǵan M.esimdi er adam, «Wooppay.kz» tólem júiesi arqyly olardyń qarajattaryn óziniń banktik kartalaryna aýdarǵan. Jalpy ol azamattarǵa 2,5 mln teńge kóleminde materialdyq shyǵyn keltirildi», – dedi Almaty qalalyq Politsiia departamenti bastyǵynyń orynbasary Rústem Ábdrahmanov.
