Foto: pixabay.com
Biyl ulttyq biryńǵai testileý 16 mamyrdan 10 shildege deiin 46 óńirlik testileý ortalyqtarynyń bazasynda ótkizildi. Oǵan 210,2 myńnan astam talapker qatysty, onyń ishinde 160,5 myń adam nemese 76,35% UBT shekti balyn eńserdi. Bul týraly QR Ǵylym jáne joǵary bilim ministri Saiasat Nurbektiń 12 tamyzdaǵy QR Úkimetiniń otyrysynda aitty, dep habarlaidy Ult.kz.
Biyl UBT-nyń ortasha baly 69,42 baldy qurady.
2025 jyly memlekettik bilim granttarynyń konkýrsyna 113 myńǵa jýyq ótinim berildi, bul ótken jylmen salystyrǵanda 9 myńǵa artyq.
Biyl joǵary jáne joǵary oqý ornynan keiingi bilimi bar kadrlardy daiarlaýǵa 93 232 grant bólindi, onyń ishinde 77 084 grant joǵary bilim alýy úshin bólindi.
Konkýrs qorytyndysy boiynsha granttar 99% kóleminde igerildi.
– 2500 grant Atyraý jáne Mańǵystaý oblystarynyń jastaryna berildi,
– Serpin jobasy boiynsha 2004 grant,
– Sheteldik joǵary oqý oryndarynyń filialdarynda oqý úshin 2 365 grant.
– Halyqtyń áleýmettik osal toptary sanatyndaǵy balalarǵa 9,5 myń grant,
– 2, 1 myń grant – qandastarǵa berildi.
Alǵash ret merzimdi áskeri qyzmet ótkergen azamattar úshin 2 010 bilim berý granty bólindi.
Saiasat Nurbektiń málimdeýinshe 2020 jylmen salystyrǵanda stýdentterdiń stipendiiasy 2 esege ulǵaitylǵan.
"Jyl saiyn 300 saralanǵan granttar, biylǵy jyly «Keleshek» biryńǵai jinaqtaý júiesi engizildi – bul memleket (bir rettik bastapqy kapital – 60 AEK), qorlar, ata-analar jáne bankterdiń qatysýymen 5 jastan bastap bilim berý kapitalyn qalyptastyrýǵa arnalǵan júie. Jinalǵan qarajat esebinen joǵary bilim alýǵa nemese turǵyn úi jaǵdaiyn jaqsartýǵa bolady. Jalpy memlekettik bilim berý jinaqtaý júiesi sheńberinde 133 969 myńǵa jýyq salym ashylǵan, onyń 34 768 salymy 2025 jylǵy 12 mamyrdan bastap «Keleshek» biryńǵai jinaqtaý júiesi negizinde ashylǵan. Biyl da jyldaǵydai memlekettik granttardan basqa 5 myńǵa jýyq grant bólinetinin atap ótkim keledi, olar ákimdikterdiń (1 700-den artyq grant), jumys berýshilerdiń (400 grant), ártúrli qorlar (500 grant) men rektorlar bóletin granttar (2 200 grantqa jýyq)", - dedi ministr.
Jatahana máselesi
"Stýdentter úshin oqý jylynyń basynda mańyzdy máselelerdiń biri – jataqhanaǵa ornalasý. Jalpy ótken oqý jylynda jataqhanaǵa degen tapshylyq Astana jáne Almaty qalalarynda ǵana baiqaldy. Biyl Almaty qalasynyń joǵary oqý oryndarynan basqa óńirlerde jataqhanaǵa degen tapshylyq joq", -dedi ol.
2025 jylǵa 10 439 oryndyq 29 jataqhanany iske qosý josparlanǵan (onyń ishinde JOO stýdentteri úshin 8 325 oryndyq 20 jataqhana, kolledj stýdentteri úshin – 2 114 oryndyq 9 jataqhana).
Ministrdiń sózinshe qazirgi tańda 3 528 oryndyq 4 jataqhana iske qosyldy (JOO stýdentteri úshin Túrkistan qalasynda – 652 oryndyq
2 jataqhana, Astana qalasynda – 2 876 oryndyq 2 jataqhana).
Qyrkúiek aiyna deiin 4 228 oryndyq 19 jataqhana iske qosylýy kútilýde (JOO stýdentteri úshin 3 052 oryndyq 11 jataqhana Astana, Almaty, q., Abai obl., kolledj stýdentteri úshin 1 116 oryndyq 8 jataqhana Almaty, Shymkent q., Aqmola, Qostanai, Almaty, Jambyl, Túrkistan obl).
Odan basqa, jyldyń sońyna deiin 2 683 oryndyq 6 jataqhana iske qosylady (JOO stýdentteri úshin 1 745 oryndyq
5 jataqhana Almaty q., kolledj stýdentteri úshin 938 oryndyq 1 jataqhana Astana q.).
Ǵimarattardyń kúii
"Jaz ailarynda joǵary oqý oryndarynyń 58 nysany kúrdeli jóndeýden, 560-tan astam nysan aǵymdaǵy jóndeýden ótkizilýde. Barlyq jóndeý jumystary 20 tamyzǵa deiin aiaqtalady dep josparlanýda. Sonymen qatar, oqý ǵimarattary men jataqhanalarda beinebaqylaý júieleri, týrniketter, dabyl túimeleri, órtke qarsy quraldar ornalastyrylǵan", - dedi S. Nurbek.
Sondai-aq ministrdiń sózinshe 80-nen astam ýniversitettiń nysandarynda terroristik qaýipsizdik pasporttary bekitilgen, sondai-aq, litsenziiasy bar kúzet agenttikterimen kelisimder jasalǵan.
