Doktorantýraǵa grantqa túsý úshin shekti ball 75 baldy quraidy. Al, oqýǵa aqyly negizde túsý úshin shekti ball – 50, dep habarlaidy "Ult aqparat".
Bul týraly búgin Bilim jáne ǵylym ministrliginiń Instagram paraqshasynda ótken tikelei efir barysynda QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev málimdedi.
Onyń aitýynsha, biyl doktorantýraǵa ótinish qabyldaý 3 shildede bastalyp, 3 tamyzǵa deiin jalǵasady. Doktorantýraǵa túsý emtihandary 4-20 tamyz aralyǵynda ótedi. Osy rette doktorantýraǵa túsý úshin bir ǵana joǵary oqý ornyn jáne bir bilim berý baǵdarlamalarynyń tobyn tańdaýǵa bolatynyn aita ketken jón.
«Doktorantýraǵa túsý úshin ótinishter joǵary oqý oryndarynyń qabyldaý komissiialary arqyly qabyldanady. Budan ári ótinishter Ulttyq testileý ortalyǵynyń aqparattyq júiesinde tirkeledi. Oqýǵa túsýshiler óńirlik testileý ortalyqtarynda túsý emtihandaryn tapsyrady. Mádeniet jáne sport ministrligi men Densaýlyq saqtaý ministrligine vedomstvolyq baǵynysty joǵary oqý oryndaryna túsýshiler emtihandardy óz joǵary oqý oryndarynyń bazasynda tapsyrady», – dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Túsý emtihandarynyń kestesin QR BǴM Ulttyq testileý ortalyǵy ázirleidi. Túsý emtihandaryn ótkizý baǵdarlamalary men kestesi oqýǵa túsýshilerge emtihan bastalǵanǵa deiin habarlanatyn bolady.
Esterińizge sala keteiik, biyldan bastap doktorantýraǵa túsý emtihany elektrondyq formatta ótedi. Úmitkerler kompiýterde esse jazady, doktorantýrada oqýǵa daiyndyq boiynsha test jáne bilim berý baǵdarlamasynyń beiini boiynsha emtihandar tapsyrady.
«Qabyldaý emtihandary testileý ortalyqtary bazasynda alǵash ret elektrondyq formatta ótedi. Bul format ótken jyly magistratýraǵa qabyldaý kezinde aprobatsiiadan ótken bolatyn. Degenmen, bul túsý emtihandary tek testileý formatynda bolady degen sóz emes. Sonymen birge bolashaq doktoranttar joǵary oqý oryndary bekitetin taqyryptar boiynsha esse jazady. Esseni baǵalaý, doktorantýrada oqýǵa daiyndyq testi jáne beiindi emtihandardyń nátijeleri arqyly alynǵan baldar jinaqtalyp, qabyldaý emtihanynyń qorytyndy baǵasy shyǵarylady», – dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Jalpy, oqýǵa túsý emtihanynyń eń joǵary kórsetkishi - 100 ball.
Onyń ishinde esse – 20 ball, doktorantýrada oqýǵa daiyndyǵyn anyqtaýǵa arnalǵan test – 30 ball, beiindi emtihan suraqtary – 50 ball. Jalpy emtihanǵa 4 saǵat beriledi.
Doktorantýra boiynsha memlekettik bilim tapsyrysyna keletin bolsaq, 2021-2022 oqý jylyna PhD mamandaryn daiarlaýǵa arnalǵan memlekettik grant sany 1890 grantty quraidy.
Doktorantýraǵa «magistr» dárejesi jáne keminde toǵyz ai jumys ótili bar nemese meditsinalyq mamandyqtar boiynsha rezidentýrada oqýyn aiaqtaǵan tulǵalar qabyldanady.
