Jumyspen qamtýǵa járdemdesý sharalarymen 735 myń adam qamtylady. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa otyrysynda vedomstvo basshysy Birjan Nurymbetov aitty, dep habarlaidy QazAqparat.
Ministrdiń aitýynsha, «Eńbek» nátijeli jumyspen qamtýdy jáne jappai kásipkerlikti damytýdyń memlekettik baǵdarlamasyn júzege asyrý aiasynda 2019 jyly jumyspen qamtýǵa járdemdesýdiń belsendi sharalarymen 660 myń adam qamtylǵan.
«450 myń adam jumysqa, onyń 383 myńy nemese 85 paiyzy turaqty jumys oryndaryna ornalastyryldy. 150 myńnan astam adam oqytyldy. Onyń ishinde 75 myń adam biznes negizderine oqýdan ótti. Óz isin damytý úshin shamamen 18 myń jeńildetilgen mikrokredit, 40 myńnan astam memlekettik grant berildi. Bul 18 myń qosymsha jumys ornyn ashýǵa múmkindik jasady. Memleket sýbsidiialaǵan jumys oryndaryna 140 myń adam jumysqa ornalastyryldy. Soltústik óńirlerge 9 myńnan astam adam qonys aýdardy. Onyń 4,5 myńy eńbekke qabiletti jastaǵy adamdar, olardyń basym bóligi jumyspen qamtylǵan, biznesin damytyp, basqa da qoldaý sharalaryn alyp jatyr», – dedi Birjan Nurymbetov.
Sonymen qatar, ol «Eńbek» memlekettik baǵdarlamasyn iske asyrý eńbek naryǵynyń turaqtylyǵyna yqpal etetinin, jumyssyzdyq deńgeii 4,8 paiyzdy quraitynyn atap ótti.
«2020 jyly jumyspen qamtýǵa járdemdesý sharalarymen qamtýdy halyqtyń áleýmettik jaǵynan osal toptarynyń ishinen 735 myń adamǵa deiin arttyrýdy josparlap otyrmyz. Biz memlekettik baǵdarlamanyń tetikterin jetildirdik. Endi qysqa merzimdi oqytý jumys berýshilerdiń ótinimderi boiynsha ǵana júrgiziledi. Kópbalaly jáne tabysy az otbasynan shyqqan memlekettik baǵdarlama qatysýshylaryna 7 jylǵa deiingi merzimge jyldyq 4 paiyzdan aspaityn mólsherlememen jeńildetilgen mikrokreditter beriletin bolady. Jastardy turaqty jumysqa ornalastyrýdyń «Alǵashqy jumys orny» jáne «Urpaqtar kelisimsharty» jańa tetikteri engizildi», – dedi ministr.
