Oqý-aǵartý ministrligi 2026–2027 oqý jylyna arnalǵan oqýlyqtar men oqý-ádistemelik keshenderdiń tizbesin bekitý jáne bilim berý uiymdaryn oqýlyqtarmen qamtamasyz etý jumystaryn jalǵastyryp jatyr, dep habarlaidy ult.kz.
Ministrliktiń málimetinshe, Memleket basshysy Qasym-Jomart Toqaevtyń tapsyrmasyna sáikes barlyq oqýlyqtarǵa qosymsha saraptama júrgizilgen. Bul jumystar oqýlyqtardyń sapasyn arttyrý maqsatynda qolǵa alynǵan jáne Úkimettiń erekshe baqylaýynda.
Buǵan deiin Premer-Ministrdiń orynbasary – Mádeniet jáne aqparat ministri Aida Balaeva qosymsha tekserý barysynda mektep oqýlyqtarynan 700-den astam eskertý men qatelik anyqtalǵanyn málimdegen bolatyn. Osyǵan bailanysty oqýlyqtardy bekitpes buryn olardy tolyqtyrý jáne jetildirý týraly sheshim qabyldandy.
Qazir baspalar men sarapshylar anyqtalǵan kemshilikterdi túzetý jumystaryn júrgizip jatyr. Ministrlik qosymsha ýaqyt oqýlyqtardyń sapasyn tolyq qamtamasyz etý úshin qajet ekenin atap ótti.
Sonymen qatar jańa oqý jylyna daiyndyq aiasynda oqýlyqtardy satyp alý jumystary josparly túrde jalǵasýda. 2026 jylǵy 30 tamyzǵa deiin 3-synypqa arnalǵan «Qazaq tili», «Orys tili», «Matematika», «Dúnietaný», «Ádebiettik oqý», «Mýzyka» pánderiniń, sondai-aq 7-synypqa arnalǵan «Dúniejúzi tarihy» oqýlyqtarynyń jetkizilýi josparlanǵan.
Oqýlyqtardy irikteý Etandau.gov.kz elektrondyq platformasy arqyly júrgizilgen. Onyń nátijesinde jergilikti atqarýshy organdar qajetti ótinimderdi qalyptastyryp, baspalarǵa joldaǵan. Sondai-aq óńirlerde oqýshylar sanynyń artýy men kitaphana qoryn jańartý qajettiligine bailanysty qosymsha satyp alý jumystary da júrgizilýde.
Ministrlik málimetinshe, oqýlyqtardy jańartý kezeń-kezeńimen jalǵasady. 2027 jylǵy 1 qańtarǵa deiin 4 jáne 9-synyptardyń, al 2027 jylǵy 1 sáýirge deiin 8-synyptyń oqýlyqtaryn jańartý josparlanǵan.
Vedomstvo oqýshylardy jańa oqý jylyna sapaly ári zamanaýi oqýlyqtarmen ýaqytyly qamtamasyz etý úshin barlyq qajetti jumystar jalǵasyp jatqanyn málimdedi.
