Halqy eń uzaq ómir súretin Japoniia eli zeinetaqy reformasyn jasaýdy josparlap otyr. Premer-ministr Sindzo Abe japondyqtarǵa zeinetke 70 jastan keiin shyǵýǵa usynys bildirip, onyń ornyna tólemaqynyń kólemi artatynyn jetkizdi, dep habarlaidy QazAqparat BBC-ge silteme jasap.
Álemniń damyǵan memleketteriniń kópshiligi zeinetke shyǵý jasyn 65 jastan asyrýǵa qyzyǵýshylyq tanytyp otyr. Al Japoniia halqynyń demografiiasy men ulttyq minezindegi erekshelikter bul jarysta basyp ozýǵa májbúrleidi.
Sindzo Abe 6 jyldan beri úkimetti basqaryp keledi jáne qyrkúiek aiynda taǵy da 3 jyldyq mandatty alýy múmkin. Abe aldyńǵy qatarly Nikkei japon gazetine bergen suhbatynda bul merzimdi áleýmettik salany reformalaýǵa jáne eldiń basty problemasy - demografiialyq máseleni sheshýge arnaǵysy keletinin aitty.
Abe basqarǵan ýaqyt aralyǵynda Japoniia halqynyń jyldam qartaiýy men azaiýyna qaramastan, el ekonomikasy 8 paiyzǵa ósken. Bul zeinetkerlerdi ekonomikaǵa aralasýǵa tartýmen bailanysty bolýy múmkin. Mysaly, 2012 jyly 65 jastan asqan azamattardyń 20 paiyzy ǵana eńbek etse, qazir bul kórsetkish 23,5 paiyzǵa deiin kóterilgen.
Premer-ministrdiń aitýynsha, bul úrdisti bekitip, ary qarai damytý kerek. Úkimet basshysy ol úshin japondyqtarǵa zeinetaqy tólemderinen 70 jastan keiin de bas tartýǵa ruqsat berip, bul mejeden asqan soń kóbirek aqsha alýǵa múmkindik jasaý kerek degen oida.
