QR Qarjy ministrligi Memlekettik kirister departamentiniń Ekonomikalyq tergeýler qyzmeti jarty jylda atqarǵan jumysy boiynsha esep berdi, dep xabarlaidy QazAqparat tilshisi.
Sońǵy alty aidyń ishinde uiymdasqan qylmystyq toptarǵa qatysty 48 is qozǵaldy. Sonyń 29-y sotqa jiberildi. Jalpy, Ekonomikalyq tergeýler qyzmetiniń úlesinde shamamen 1,5 myń aýyr jáne asa aýyr qylmystyq is boldy. Atalǵan isterdiń 67 paiyzy aiaqtaldy.
«Sol aiaqtalǵan ister boiynsha memleketke kelgen shyǵyn 151,5 mlrd teńgeni qurady. Atalǵan qarjynyń bári áleýmettik baǵdarlamalarǵa arnalǵan bolatyn. Ol aqshaǵa shamamen 70 mektepti nemese 80 balabaqshany turǵyzýǵa, nemese 40 aýrýxanany salyp, ony tolyǵymen qajetti qural-jabdyqtarmen qamtamasyz etýge bolatyn edi», - deidi profilaktikalyq jumys jáne baqylaý basqarmasynyń bastyǵy Arman Esembaev.
Onyń aitýynsha, búginde 48 mlrd teńge qaitaryldy. Oǵan qosa, 24,2 mlrd teńgeniń múlki tárkilendi.
