Aǵymdaǵy jyldan bastap 7 paiyzdyq ipotekalyq nesie berile bastaýy múmkin. Bul týraly búgin QR Prezidenti Nursultan Nazarbaevtyń 5 áleýmettik bastamasyna orai pikir bildirgen Májilis depýtaty Nurtai Sabilianov aitty, dep habarlaidy QazAqparat.
«Elbasymyzdyń búgingi bastamasynda halyqqa jeńildetilgen nesie berý máselesi tolyq sheshimin taýyp otyr. Endi biz Prezident bastamalaryn jańa zańdar, jańa normativtik-quqyqtyq aktiler qabyldaý arqyly sapaly túrde júzege asyrýymyz qajet», - dedi depýtat.
Onyń aitýynsha, «7-20-25» baǵdarlamasy arqyly halyq 25 jylǵa 7 paiyzben nesie alýǵa qol jetkizedi.
«Nesieni ekinshi deńgeili bankter arqyly da alýǵa múmkindik týyndaidy. Qazirgi ýaqytta Turǵynúiqurylysjinaqbanki arqyly ǵana nesie berilip jatyr. Al bul banktiń barlyq óńirde bólimsheleri joq. Sondyqtan halyqqa qai bank yńǵaily bolsa sodan jeńildetilgen nesie berý qolǵa alynady. Iaǵni, Qazaqstannyń barlyq bankteri osy baǵdarlama aiasynda jeńildetilgen ipotekalyq nesie berý múmkindigin ie bolady. Elbasynyń osy bastamalaryn zańmen qamtamasyz etip, biýdjet naqtylanǵannan keiin jeńildetilgen nesie berý bastalady dep oilaimyn. Menińshe, osy jyldan bastap halyq jeńildetilgen nesie alyp qalýy yqtimal. Óitkeni, respýblikalyq biýdjet naqtylanǵan kezde Elbasynyń osy bastamalaryn júzege asyrýǵa arnalǵan qarajattar qarastyrylady», - dedi Nurtai Sabilianov.
Depýtattyń paiymynsha, jańa baǵdarlamanyń júzege asyrylýy turǵyn úilerdiń qymbattaýyna túrtki bolmaidy.
«Qazirgi ýaqytta úilerdiń baǵasy birqalypty, turaqty. Qaita turǵyn úi salý arqyly bizde shaǵyn jáne biznes damyp, jańa jumys oryndary ashylatyn bolady», - dedi ol.
