2020 jyldyń 7 aiynyń qorytyndysy boiynsha ónerkásip óndirisiniń kólemi 1,3 paiyzǵa ósti. Bul týraly Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy "Ult aqparat".
«Elimizde 2020 jyldyń 7 aiynyń qorytyndysy boiynsha ónerkásip óndirisiniń kólemi 1,3 paiyzǵa ósti. 12 óńir oń nátije kórsetti. Taý-ken óndirý sektorynda tústi kenderdi óndirý 2,5 paiyzǵa artty. Temir ken óndirý 0,9 paiyzǵa ósti. Kómir ónimderin tutyný kóleminiń artýyna bailanysty kómir óndirý kólemi 102,6 paiyzdy qurady. Kómir óndirýshi kompaniialar 2020 jylǵy qańtar-shilde ailarynda 62 mln tonna kómir óndirdi. Bul ótken jyldyń sáikes kezeńimen salystyrǵanda 3 paiyzǵa arttyq», - dedi ministr.
Onyń dereginshe, óńdeý ónerkásibinde naqty kólem indeksi tústi metallýrgiia, farmatsevtika, jeńil ónerkásip, mashina jasaý, himiia jáne basqa da salalar esebinen 3,8 paiyzǵa ósti. Tústi metallýrgiiada óndiris kólemi tazartylǵan altyn óndirý kólemin 3, bastapqy aliýminiidi 1 paiyzǵa jáne basqa da kórsetkishterdiń ósýine bailanysty naqty kólem indeksi 3,9 paiyzǵa artty.
«Qara metallýrgiiada naqty kólem indeksi 98 paiyzdy qurady. Bul kórsetkish bolattyń 8, relsterdiń 10,6, bolat qubyrlardyń 12 paiyzǵa óndiris kóleminiń tómendeýine bailanysty boldy. Himiia ónerkásibinde óndiris kólemi 3,6 paiyzǵa ósti. Bul dezinfektsiialyq quraldar jáne mineraldy tyńaitqyshtar óndirý kóleminiń ulǵaiýyna bailanysty.», - dedi Beibit Atamqulov.
