«7-20-25» baǵdarlamasy aiasynda satyp alynatyn páterdiń ortasha aýdany 62 sharshy metrdi quraidy. Bul jaiynda «Baspana» ipotekalyq kompaniiasy» AQ baspasóz qyzmetinen málim etti, dep habarlaidy QazAqparat tilshisi.
Turǵyn úi naryǵyna júrgizilgen saraptamaǵa sáikes, aýdany 62 sharshy metrdi quraityn páterler negizinen 2 bólmeli bolyp keledi. Sonymen qatar, «Baspana» ipotekalyq uiymynyń mamandary «7-20-25» baǵdarlamasy boiynsha klientter satyp alatyn baspananyń ortasha qunyn da eseptep shyǵarǵan. Baspananyń ortasha quny 14 million 68 myń teńgeni quraidy. Zaemshy da anyqtalyp, onyń jalpy beinesi de aiqyndalǵan. Olar - otbasylyq tabysy shamamen 200 myń teńgeni quraityn 24 pen 40 jas aralyǵyndaǵy qazaqstandyqtar.
«Baǵdarlamaǵa qatysýǵa niet bildirgen kóptegen azamattardyń ótinimderi bank tarapynan maquldanyp jatqanyn kórip otyrmyz. Bul «7-20-25» baǵdarlamasynyń áleýmettik baǵdarlanǵan, onyń der ýaqytynda qolǵa alynǵanyn ári óte ózekti ekendigin kórsetedi», - dedi ipotekalyq uiym basqarmasynyń tóraǵasy Qairat Altynbekov.
Onyń atap ótýinshe, jyldyq stavkasy 7 paiyz bolǵandyqtan «7-20-25» baǵdarlamasy boiynsha ai saiynǵy tólem páterdi jalǵa alýdan birshama arzanǵa túsedi.
«Buǵan qosa, zaemshy óziniń úiinde turatyn bolady jáne endigi ýaqytta ol páter jaldaýshy emes. Bul óte jaqsy ekendigine kelisesizder ǵoi», - deidi Qairat Altynbekov.
13 tamyzǵa deiingi derekterge sáikes baǵdarlamanyń seriktes bankterine 15,4 mlrd teńge zaim alýǵa 1323 ótinim kelip tústi. Onyń ishinde somasy 9,7 mlrd teńgeni quraityn 843 ótinim maquldandy. Qazirgi ýaqytta el turǵyndary ipotekalyq baǵdarlama arqyly kreditti TsentrKredit, ATFBank, Bank RBK jáne TsesnaBank bankterinen ala alady.
