Búgin Almatyda ótip jatqan Qarjygerler kongresinde «Baspana» Ipotekalyq uiymy» AQ basqarma tóraǵasy Qairat Altynbekov «7-20-25» baǵdarlamasy boiynsha nesieni onlain maquldaý qashan engiziletinin habarlady, dep habarlaidy QazAqparat tilshisi.
«Biz qazir osy joba boiynsha jumys jasap jatyrmyz. Jańa joba bolashaq klientterge nesieni onlain maquldaýǵa múmkindik beredi. Bul ipotekalyq kalkýliator emes, nesieni maquldaý. Ol úshin bankke kelip ýaqyt shyǵyndaýdyń qajeti joq. Birinshiden, barlyq aqparat Birinshi nesie biýrosynda bar. Ekinshiden, adamnyń tabysy jaily aqparatty biz zeinetaqy tólemderi boiynsha memlekettik ortalyqtan, málimetterdiń memlekettik derekqorynan alamyz. Biz klient týraly aqparatty tolyq biletin bolamyz. Árine, tek onyń ruqsatymen ǵana», - dedi Qairat Altynbekov.
Onyń aitýynsha, barlyq aqparat avtomatty rejimde óńdelip, quzyrly organdar nesieni maquldaý týraly sheshim shyǵara alady.
Odan ári elektrondy nesie isi jasalady. Bul bankke qaǵaz qujattardy tasýdyń qajettiligin joiady.
«Qazir biz osy pilottyq jobany qolǵa alyp jatyrmyz. Keler jyldyń basynda bul júie tolyq iske qosylatyn bolady. Jańa joba klientterdiń nesie alý jyldamdyǵyn jaqsartyp, banktiń shyǵyndaryn qysqartady. Nesieni berý úshin oǵan aýdit jasaýdyń qajettiligi bolmaidy», - dedi Qairat Altynbekov.
Aita ketsek, QR Ulttyq banki tóraǵasy atalǵan baǵdarlamanyń operatory «Baspana» ipotekalyq uiymy bolatynyn 5 mamyrda aitqan edi. Ulttyq bank bekitken baǵdarlama boiynsha ipotekalyq qaryzdar 7% jyldyq mólsherlememen 25 jylǵa beriledi. Kelesi sharttarynyń biri - alǵashqy salym 20% bolmaq. Jańa ipotekalyq zaimdardy Qazaqstannyń kez kelgen azamaty ala alady. Ol úshin eń basty shart - adamnyń basynda jyljymaityn múlki bolmaýy kerek. Baǵdarlama boiynsha Qazaqstannyń kez kelgen óńirinen Almaty, Astana, Atyraý, Shymkent qalalarynan eń maksimaldy 25 mln teńgege, qalǵan óńirlerde 15 mln teńgege baspana satyp alýǵa bolady.
Qazirgi tańda Qazaqstan boiynsha quny 50 mlrd teńge bolatyn ótinimder qabyldandy. Onyń ishinde 35 mlrd teńgeniń nesieleri maquldanyp otyr.
