Memleket basshysy belgilegen «7-20-25. Árbir otbasyna baspana alýdyń jańa múmkindikterin berý» baǵdarlamasynyń negizgi ólshemderi ózgerissiz qalady, bul túpkilikti mólsherleme jyldyq 7%, komissiiasyz jáne qosymsha aqysyz, turǵyn úi qunynyń bastapqy jarnasy 20 paiyz, kredittiń eń uzaq merzimi 25 jyl. Bul jóninde búgin «Baspana» Basqarma Tóraǵasy Qairat Altynbekov Ulttyq Banktiń jáne «Baspana» ipotekalyq uiymynyń Almaty qalasynda ótken brifingi barysynda aityp berdi, dep habarlaidy Baq.kz aqparat agenttigi.
Ol turǵyn úi satyp alý úshin Astana, Almaty, Aqtaý jáne Atyraý qalalary úshin baǵanyń eń joǵary shegi 25 million teńge, al qalǵan óńirler úshin - 15 mln teńge dep belgilengenin atap ótti. Nysanaly indikatorlarǵa sáikes ipotekalyq kreditterdiń jalpy kólemi 1 trillion teńgeni quraidy.
«Baǵdarlamaǵa menshik quqyǵynda baspanasy jáne basqa da ipotekalyq qaryzdary joq Qazaqstannyń árbir azamaty qatysa alady. Baǵdarlama qatysýshysynyń kásipkerlik nemese eńbek qyzmetinen turaqty rastalǵan kirisi bolýǵa tiis. Qazirgi tańda «Baspana» Tsentrkredit Bankimen, Halyq bankimen, Eýraziia Bankimen, Tsesna Bankimen, ATF Bankimen, RBK Bankimen jáne Turǵyn úi qurylysy jinaq bankimen kelisimge qol qoidy. Sberbank pen Forte Bank baǵdarlamaǵa qyzyǵýshylyq tanytty jáne tehnikalyq jumystardy aiaqtaǵannan keiin «7-20-25» ipotekalyq baǵdarlamasy jónindegi kelisimge qol qoiýǵa daiyn. Osylaisha, bizdiń áriptes bankterimizdiń damyǵan jelisin eskere otyryp, biz «7-20-25» ipotekalyq baǵdarlamasy eldiń barlyq óńirlerin qamtyp, Qazaqstannyń biraz azamatyna kópten kútken turǵyn úiin alýǵa kómektesedi dep úmittenemiz», - dedi Q. Altynbekov.
Onyń aitýynsha, baǵdarlamaǵa qatysý úshin kelesi qujattardyń bolýy jónindegi talaptar aiqyndaldy. Atap aitqanda, áleýetti qaryz alýshy bankke eńbek nemese kásipkerlik qyzmetten kirisiniń bolýyn rastaityn qujattardy, ipotekalyq turǵyn úi qaryzdary boiynsha ótelmegen beresheginiń bolmaýy týraly málimetti, turǵyn úiiniń bolmaýy týraly anyqtamany, satyp alatyn turǵyn úi qujattaryn jáne táýelsiz baǵalaýshynyń baǵasyn usynýǵa tiis.
«Ipotekalyq kreditterdi satyp alý tetigi áriptes banktermen ońtaily pysyqtalýda. Bankter ipotekalyq kreditterdi 7-20-25 baǵdarlamasynyń talaptaryna sáikes beredi, «Baspana» óz kezeginde bankterden ipotekalyq kreditterdi satyp alady. Biz resmi www.baspana72025.kz saityn iske qostyq, odan barlyq qajetti aqparatty alýǵa bolady. Sondai-aq + 7 (727) 227-20-25 tegin nómiri boiynsha call-ortalyq táýlik boiy jumys isteidi. Qazirgi ýaqytta 7-20-25 baǵdarlamasynyń mobildi qosymshasy ázirlenýde, ol jýyq arada App Store men Play Market arqyly kóshirip alý úshin qol jetimdi bolady», - dedi Q. Altynbekov.
Qorytyndylai kele, ol buqaralyq aqparat quraldary men áleýmettik jeliler arqyly túsindirý jumystary júrgiziletin bolady dep atap ótti. «Baspana» kez kelgen qajetti aqparatty jedel ári tolyq kólemde usynýǵa daiyn.
