«7-20-25» baǵdarlamasynyń jańa ipotekalyq mehanizmderine bailanysty «Nurly jer» baǵdarlamasyna ózgeris engizildi. Bul týraly OKQ-da ótken baspasóz máslihatynda QR Investitsiialar jáne damý ministri Jeńis Qasymbek málim etti, dep habarlaidy QazAqparat tilshisi.
Memleket basshysynyń «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» Joldaýyna bailanysty ózi jetekshilik etetin ministrliktiń jumysyn baiandaǵan Jeńis Qasymbek turǵyn úi ózekti másele retinde kún tártibinen túspeitinin atap ótti.
«Byltyr «Nurly jer» baǵdarlamasyn iske asyrýdyń nátijesinde 100 myńnan astam otbasy jańa baspanaǵa qol jetkizdi. 2017 jyldyń qorytyndysy boiynsha Qazaqstanda paidalanýǵa berilgen turǵyn úi kólemi 11 million sharshy metrden asty. Iaǵni, 2016 jylǵa qaraǵanda bul kórsetkish 6,2 paiyzǵa joǵary. Esterińizde bolsa, buryn KSRO kezinde «Turǵyn-úi - 91» degen baǵdarlama bolǵan. Sol kezde Qazaqstanda jylyna 6,5 million sharshy metr turǵyn úi iske qosylatyn. Ótken jylda 11 mln-nan astam sharshy metr turǵyn úimen 100 myńnan astam otbasyny baspanamen qamtýǵa qol jetkizdik. Bul turǵyn úi qurylysyn iske asyrǵan jyldardaǵy eń joǵarǵy kórsetkish», - dedi Jeńis Qasymbek.
Ministr óz sózinde qurylys júrgizýdiń jańa ádisterin júzege asyrý, jobalaýdy tiimdi túrde qarastyrý jumysy bastalyp ketkenin atap ótti. Onyń aitýynsha, Memleket basshysynyń Joldaýynda kórsetilgen tapsyrmalarǵa sáikes, úi qurylysyn júrgizýdiń jańa standarttaryn engizý júktelgen. Qazirgi tańda ministrlik eýrokodtardy engizý jumysyn qyzý júrgizýde.
«Memleket basshysynyń jariialaǵan «Bes áleýmettik bastamasyna» sai, biz osy aida «Nurly jer» baǵdarlamasyna «7-20-25» jańa ipotekalyq baǵdarlamasyn esepke ala otyryp, ózgeris engizýdi kózdep otyrmyz. Qysqasha aitar bolsam, jańa baǵdarlama aiasynda nesie boiynsha syiaqynyń stavkasy jylyna 7 paiyzǵa deiin tómendep, alǵashqy salym 20 paiyzdan aspai, al ai saiyn úi tólemin óteýdi jeńildetý úshin nesieniń merzimi 25 jylǵa deiin uzartylatyn bolady. Bul mehanizm arqyly árbir jumys isteitin adam nesiege páter ala alady. Qazaqstandyqtardyń kóbiniń tiimdi sharttar arqyly baspana satyp alýǵa múmkindigi bolady. Biylǵy jyldyń ekinshi jartysynda barlyq sanattaǵy azamattar úshin alǵashqy arzan ipoteka beriledi», - dedi Jeńis Qasymbek.
