QR Investitsiialar jáne damý ministri Jeńis Qasymbek Memleket basshysynyń «7-20-25» bastamasyn júzege asyrý sharalaryna túsinik berdi, dep habarlaidy QazAqparat.
«Qazirgi kezde «Nurly jer» baǵdarlamasyna túzetýler engizilýde. Bul sharalar jańa «7-20-25» baǵdarlamasyna qosymsha infraqurylymnyń qajettigine bailanysty jasalyp otyr. Sondyqtan atalǵan baǵdarlama aiasynda qosymsha jumystar josparlanyp otyr», - dedi ministr Úkimet otyrysynan keiin.
Onyń sózine qaraǵanda, ipotekalyq zaimdardy berý ekinshi jartyjyldyqtan bastap josparlanǵan.
«Ulttyq bank eki aidyń ishinde baǵdarlamany bekitip, ekinshi jartyjyldyqtan osy ipotekany berýdi bastaidy. Bul turǵyda jańa turǵyn úiler eskerilip otyr», - dedi vedomstvo basshysy.
Budan bólek, ol «Nurly jer» baǵdarlamasy ary qarai jalǵasatynyn atap ótti.
«Nurly jer» baǵdarlamasy sátti iske asyrylyp jatyr. Jeke turǵyn úi qurylysyn qoldaý, nesielik ári arendalyq baspana, ipoteka burynǵysynsha saqtalady», - dedi J. Qasymbek.
