Jeltoqsan aiynda Sberbanktiń qosylýymen «7-20-25» baǵdarlamasyna qatysýshy bankterdiń sany segizge jetti, dep habarlaidy QazAqparat tilshisi.
«Biylǵy jyly Elbasynyń «Bes áleýmettik bastamasynyń» birinshi bastamasyn iske asyrý boiynsha naqty sharalar atqaryldy. 4-shi shildede «7-20-25» ipotekalyq baǵdarlamasy resmi túrde jumys istei bastady. 2018 jyldyń qorytyndysy boiynsha quny 70 mlrd teńgeden astam 6 myńnan astam ótinish kelip túsken bolatyn. Sonyń ishinde quny 45 mlrd teńgelik 3700-ge taiaý ipotekalyq nesie maquldandy», - dep atap ótti «Baspana» Ipotekalyq uiymy» AQ basqarma tóraǵasy Qairat Altynbekov OKQ-da ótken baspasóz máslihaty barysynda.
Qairat Altynbekovtyń aitýyna qaraǵanda, qoldanysta bolǵan úilerge nesie beretin «Baspana-hit» baǵdarlamasy boiynsha da quny 1,7 mlrd teńgeniń ótinimi maquldandy.
«Qazirgi tańda «7-20-25» ipotekalyq baǵdarlamasyna qatysýshy bankterdiń sany segizge jetti. Sońǵy ret jeltoqsan aiynda baǵdarlamaǵa Sberbank qosyldy. Osylaisha, «7-20-25» ipotekalyq baǵdarlamasyna kelesi bankter qatysýda. Olar: Bank Tsentr Kredit, ATF bank, Halyq banki, Tsesna bank, Eýraziia banki, Bank RBK, Forte bank jáne Sberbank. Baǵdarlamany qarjylandyrý jaǵynan eshqandai másele joq», - deidi ol.
