Turǵyn úi qurylys jinaq banki "7-20-25" baǵdarlamasynyń sharttaryn túsindirý maqsatynda mobildi toptar qurdy, dep habarlaidy banktiń baspasóz qyzmeti.
"Turǵyn úi qurylys jinaq banki qyzmetkerleri men shtattan tys keńesshileri kiretin mobildi toptar "7-20-25" baǵdarlamasyna qatysý sharttaryn azamattarǵa túsindirý úshin kásiporyndar men uiymdarǵa shyǵatyn bolady. Alǵashqy 8 top Almaty qalasynda quryldy, aldaǵy ýaqytta bul bastamaǵa basqa da aimaqtar qosylady", — dep habarlady bank.
Kúnine 1500-1900 adam
Bul sheshim bank filialdaryndaǵy kezekti azaitý úshin qabyldanǵan. Jańa turǵyn úi baǵdarlamasy iske qosylǵan soń bólimshelerdegi klient sany birneshe ese artypty. Astana men Almatyda ornalasqan eń iri bólimder kúnine 1500-1900 adamnan qabyldap jatyr.
Bank menedjeriniń qyzmetin alý úshin eń uzaq kezekte elorda turǵyndary turýǵa májbúr. Sebebi jalpy keńes berý men 7-20-25 baǵdarlamasy boiynsha ótinim qabyldaýdan bólek Turǵyn úi qurylys jinaq bankiniń astanalyq filialdarynda "Nurly jer" baǵdarlamasy aiasynda 300-den astam zaem resimdelip, berilip jatyr. Budan bólek "Óz úiim" baǵdarlamasy boiynsha da 162 páter satylýda. Sondai-aq bank qazir áskeri qyzmetshilermen de belsendi jumys júrgizip otyr. Astanada áskerilerdiń 3 500-dai arnaiy shotyna qyzmet kórsetiledi.
"Osyndai jaǵdaidyń oryn alyp, bank klientteriniń ýaqytyn kezekte turýǵa jumsap jatqandaryna ókinishimizdi bildiremiz. Bastapqy kezeńde bólimshelerimizdi shtattan tys keńesshilermen qosymsha kúsheittik. Salymshylarymyz banktiń qazirgi jumysynyń bizge habarlasqan ár klienttiń qajet aqparat alyp, máselesin barynsha jyldam jáne jaily sheshýge baǵyttalyp jatqanyn bilýi kerek", — dep túsindirip ótti Turǵyn úi qurylys jinaq banki basqarma tóraiymynyń orynbasary Janar Jubaniiazova.
Bankke barýdyń qajeti joq
Ol qazirgi ýaqytta banktiń bólimshege barmai-aq keńes alýǵa arnalǵan túrli quraldar men ádisterdiń usynyp otyrǵanyn atap ótti.
Mysaly, klientterde videobailanys ornatý arqyly qashyqtan keńes alý múmkindigi bar. Ol úshin hcsbk.kz saityna nemese baspana.kz portalyna ótip, oń jaqta ornalasqan videobailanys belgisine basý kerek. Bul qyzmetti smartfon arqyly da, kádimgi kompiýter arqyly da alýǵa bolady.
Video keńes alý qyzmetiniń kómegimen klient depozit jáne nesie, jańa kelisim-shart bekitýge qatysty keńes alyp, shot boiynsha kóshirme resimdep, postdepozittik operatsiialar júrgizip, anyqtamalar ala alady. Sondai-aq Turǵyn úi qurylys jinaq banki menedjeri jańa qyzmettiń kómegimen keńes berýden bólek saitpen, "JSSB 24" internet-bankingimen jáne Baspana.kz jyljymaityn múlik portalymen jumys júrgizýge kómektesedi.
Qyzmetti jumys kúnderi 9.00 men 19.00 aralyǵynda paidalanýǵa bolady. Al senbi kúnderi operator 9.00-den 13.00-ge deiin jumys isteidi.
"Turǵyn úi qurylys jinaq banki klientteriniń 60%-daiy úide nemese jumysta otyryp-aq keńes alyp, tipti depozit ashyp jatady. Bul bank keńesshileriniń arqasynda múmkin bolyp otyr. Olardy ózińe yńǵaily ýaqytta jáne orynǵa shaqyrý úshin kelesi silteme arqyly ótip, qalany tańdap, bailanysý kerek: https://hcsbk.kz/contacts/network-agents/. Sonymen qatar keńes alý úshin banktiń koll-ortalyǵyna 300 nómiri boiynsha qońyraý shalýǵa, hcsbk.kz saitynda "Keri bailanys" formasyn paidalanýǵa nemese Facebook, Instagram jáne VKontakte áleýmettik jelilerindegi resmi paraqshalarǵa habarlasýǵa bolady", — dep jazylǵan habarlamada.
