25 shildede Qazaqstanda 6637 adamnyń analizinen koronavirýs anyqtaldy. Elde koronavirýs kórsetkishi úzdiksiz ósip jatyr. Bir kún buryn 6631 adamnyń koronavirýs testi oń shyqqan. Byltyrdan beri bir kúnde osynsha kóp naýqas tirkelmegen.
Elde koronavirýspen bailanysty adam ólimi kórsetkishi de joǵary. Eki kún buryn 90 adam Covid-ten qaitys bolǵan: 70 adam – koronavirýstan, 20 adam koronavirýs pnevmoniiasynan qaitys bolǵan.
Elde virýs kúsheidi. Resmi málimet boiynsha, maýsym aiymen salystyrǵanda shildeniń sońǵy eki aptasynda koronavirýs juqtyrǵandar 4,8 ese ósken. Bilik virýstyń kúsheiýin koronavirýstyń delta variantymen bailanystyrady. Ol virýstyń kádimgi túrine qaraǵanda jyldam taraidy, aýrýdyń asqynýy da tez.
Indet ásirese, Nur-Sultan men Almaty, Shymkent qalalarynda, Qaraǵandy oblysynda órshigen. Ótken táýlikte Nur-Sultanda 1510 adamnan koronavirýs anyqtaldy. Almatyda – 1219, Qaraǵandy oblysynda – 781, Shymkentte 520 naýqas tirkelgen. Qalǵan oblystar men qalalarda bir táýlikte anyqtalǵan naýqastar 500-ge jetpeidi. 25 shildede eń tómen kórsetkish Soltústik Qazaqstan oblysynda (133) tirkeldi.
Indet bastalǵaly beri 535 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 59 myńnan astam adam shaldyqqan. 24 shildede 84 adamǵa koronavirýs pnevmoniiasy diagnozy qoiyldy.
2020 jyldyń naýryz aiynan beri 5452 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3625 adamnyń ólimine sebep bolǵan.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
26 shildedegi málimet boiynsha Qazaqstanda 83 084 adam koronavirýs infektsiiasynan (81 077 KVI+ jáne 2007 KVI-) emdelip jatyr.
Emdelip jatqandardyń ishinde 23 868 patsient statsionarda, 59 216 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1444 adamnyń jaǵdaiy aýyr,
• 304 patsienttiń jaǵdaiy óte aýyr,
• 183 naýqas jasandy tyny alý apparatynda apparatynda jatyr.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,1 million adam vaktsinanyń birinshi dozasyn alǵan. Ekpeniń tolyq dozasyn alǵandar 3,2 millionnan asty.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady.
