Aldaǵy aida qazaqstandyqtarǵa jalǵa beriletin turǵyn úi sýbsidiiasy beriledi. Bul týraly Qurylys jáne turǵyn úi kommýnaldyq sharýashylyq isteri komitetiniń tóraǵasy Almas Ydyrysov málim etti, dep habarlaidy QazAqparat.
«Memleket basshysy turǵyn úige muqtaj jandarǵa arnalǵan baǵdarlama ázirleýdi júktegen edi. Sol tapsyrmaǵa sáikes búginde jańa baǵdarlama iske qosyldy. Búginde 601 myń qazaqstandyq turǵyn úi kezeginde tur. Onyń ishinde 215 myńy — kópbalaly otbasy, 1 jáne 2 toptaǵy múgedek, jetim balalar jáne múgedek balasy bar otbasylar. Odan bólek, baspana kezeginde turǵan 70 myń azamat tabysy tómen sanatqa jatady. Osy atalǵan sanattaǵy azamattarǵa memleket turǵyn úi jaldaýǵa sýbsidiia beredi», - dedi Almas Ydyrysov Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, joǵaryda atalǵan 70 myń qazaqstandyq eńbek jáne halyqty áleýmettik qorǵaý ministrliginiń derekterine sai anyqtaldy.
«Sýbsidiiaǵa kelsek, jalǵa beriletin páter aqysynyń 50 paiyzyn memleket kóteredi, qalǵanyn azamattyń ózi tóleidi. Bul baǵdarlama úshin memlekettik biýdjetten 50 mlrd teńge qarastyrylǵan. Atalǵan somanyń 40 mlrd teńgesi respýblikalyq biýdjetten bólinedi, qalǵan 10 mlrd teńge jergilikti biýdjetten qarastyrylady. Jalǵa beriletin turǵyn úige sýbsidiia alýǵa ótinimdi Otbasy banki qabyldaýdy bastap ketti. Ol úshin tsifrlyq platforma ázirlendi. Otbasy bank basty operator retinde baspanaǵa muqtaj otbasylardy anyqtaidy jáne olardyń tabysyn tekseredi. Búginde azamattardan ótinim qabyldanyp jatyr, shashamen mamyr aiynda sýbsidiia berile bastaidy», - deidi ol.
