Elimizde 600-den astam meditsinalyq uiym josparly emdeýge jatqyzýdy qaita bastady, dep habarlaidy "Ult aqparat" «Áleýmettik meditsinalyq saqtandyrý qorynyń» baspasóz qyzmetine silteme jasap.
«1 tamyzynan bastap Qazaqstanda josparly meditsinalyq kómek kórsetý qaita jandandy. Birinshi kezekte, aýrýhanaǵa jatqyzýdy respýblikalyq deńgeidegi mamandandyrylǵan klinikalar, oblystyq, qalalyq jáne aýdandyq deńgeidegi kóp beiindi aýrýhanalar COVID-19-men kúres jónindegi is-sharalarǵa qatyspaityn qalǵan statsionarlardy kezeń-kezeńimen qosa otyryp júrgize bastady», delingen habarlamada.
10 tamyzyna júrgizilgen monitoring qorytyndysy boiynsha elimizde meditsinalyq saqtandyrý qorynyń 626 meditsinalyq uiymy josparly meditsinalyq kómek, onyń ishinde terapevtik, kardiologiialyq, gastroenterologiialyq, allergologiialyq, hirýrgiialyq, nevrologiialyq, pýlmonologiialyq, reanimatsiialyq, akýsherlik – ginekologiialyq, neirohirýrgiialyq, travmatologiialyq beiinder, torakaldyq hirýrgiia, qalpyna keltirý emi jáne meditsinalyq ońaltý qyzmetterin kórsetedi.
Eń kóp meditsinalyq uiymdar Almaty (67), Shyǵys Qazaqstan (54), Almaty (50) oblystarynda jumysyn qaita bastady.
Aita ketý kerek, 626 meditsinalyq uiymnyń ishinde jeke klinika aitarlyqtai jetkilikti.
Josparly meditsinalyq kómek qyzmetin jetkizýshilerdiń tolyq tizimimen qordyń saitynda tanysýǵa bolady. Tizim únemi jańartylyp otyrady.
«Koronavirýsqa qarsy is-sharalarǵa qatyspaityn meditsinalyq uiymdar jumysyn qaita bastaýǵa múmkindik aldy. Ár aimaq epidemiologiialyq jaǵdaiǵa bailanysty ár túrli bolatyn josparly meditsinalyq kómek kórsetýdi bastaýdyń jeke josparyn jasady. Ony aimaqtyq shtab baǵalaidy», – dedi qordyń baspasóz qyzmetiniń ókili.
Karantin shekteýine bailanysty kóptegen meditsinalyq qyzmetter toqtatyldy. Endi olar qaita jandanyp josparly meditsinalyq kómekti tutyný aitarlyqtai ósýi tiis. Qajetti sanitarlyq-epidemiologiialyq sharalardy ótkizgennen keiin meditsinalyq uiymdarǵa statsionarlar ashýǵa ruqsat beriledi.
«Meditsinalyq qyzmetterdi tutynýdyń boljamdy ósýin eskere otyryp, úshinshi toqsanda aǵymdaǵy jylǵa josparlanǵan kólemder oryndalýy múmkin. Mysaly, birinshi toqsanda josparly emdeýge jatqyzý ótken jyldyń sáikes kezeńimen salystyrǵanda 80% - ǵa ósti. Táýlik boiy jumys isteitin statsionarlarda mamandandyrylǵan meditsinalyq kómek 15% – ǵa, meditsinalyq ońaltý 35% - ǵa ulǵaidy. Qor óz tarapynan qarjylandyrý josparyna túzetýler engizedi», – dedi baspasóz qyzmetindegiler.
