Úkimet basshysynyń orynbasary Álihan Smaiylov «Biznestiń jol kartasy 2025» baǵdarlamasy sheńberinde kásipkerlerge qandai sharttar boiynsha jeńildetilgen nesie beriletinin aityp berdi, dep habarlaidy QazAqparat tilshisi.
«Qazirgi jaǵdaida biznesti qoldaý úshin Memleket basshysynyń tapsyrmasyna sáikes Úkimet birqatar qoldaý sharasyn qabyldady. Ekonomikanyń ósimin qamtamasyz etý úshin 2020 jyldyń aiaǵyna deiin keshendi jospar iske asyryla bastady. Ótken aptada Parlament Senaty biznes-klimatty jaqsartý jónindegi zańnamalyq bastamalardyń kezekti segizinshi paketin qabyldady. Sonymen birge óńirlerdegi biznes ókilderimen kezdesý sheńberinde qosymsha sheshýdi talap etetin máseleler qaraldy», - dedi Álihan Smaiylov Úkimet otyrysynda.
Onyń sózinshe, bul máseleler salyqtyq ákimshilendirýge, nesieler boiynsha qarjy júktemesin tómendetýge, ishki naryqty keńeitýge, jeńildetilgen nesie berýge jáne basqa da suraqtardy qamtidy.
«Osy suraqtardy júieleý boiynsha biznesti qoldaý úshin qosymsha sharalar paketi birneshe ret talqylanyp, daiyndaldy. Erekshe atap óterlik jaǵdai – osy jyldyń shilde aiynda mikro jáne shaǵyn kásipkerlik sýbektilerin qoldaý boiynsha «Biznestiń jol kartasy 2025» baǵdarlamasy sheńberinde jańa baǵyt iske qosylady. Nesieler ekinshi deńgeili bankterdiń jáne mikroqarjylyq uiymdardyń qarajaty esebinen beriledi. Operator – «Damý» qory. Nesieler ainalym qarajatty tolyqtyrý jáne investitsiialyq maqsatta 5 million jáne 20 million teńgege deiin beriletin bolady. Sońǵy stavkasy – 6 paiyz. Negizgi qaryz mólsherine 80 paiyzǵa deiin memleket tarapynan kepildik beriletin bolady», - dedi ol.
