«Qazaqtelekom» aktsionerlik qoǵamynyń bas qarjy direktory Ashat Ózbekov BAQ ókilderimen ótken brifingte Tele2 AV shvedtik bailanys operatorynyń 49 paiyzyn ne úshin satyp alǵandaryn túsindirdi, dep habarlaidy QazAqparat.
«Qazaqtelekom» ókiliniń aitýynsha, bul qadam Kcell jáne Tele2 operatorlarynyń tehnikalyq múmkindikterin bir arnaǵa toǵystyryp, jelilerdi kútip ustaý shyǵyndaryn azaitady.
«Bul qadam bizdiń jelilerdi kútip ustaýǵa ketetin jáne operatsiialyq shyǵyndarymyzdy azaitady. Bul óz kezeginde qarapaiym halyq úshin qyzmet qunynyń qoljetimdi bola túsýine yqpal etedi. Qazaqstan aýmaǵy boiynsha álemde 9-oryn alǵanymen, halqynyń qonystaný tyǵyzdyǵy óte sirek. Sol sebepti jelilerdi kútip ustaý shyǵyndary kóptegen elderge qaraǵanda joǵary. Osy sebepti tipti 5G internet te elimizge jyldamyraq kelýi múmkin», - dedi Ashat Ózbekov.
Ol sondai-aq, qazirgi Qazaqstan aýmaǵyna 5G uly bailanysyn engizý qanshalyqty qajet degen saýalǵa toqtaldy.
«Internet sapasy sońǵy kezde jyldan-jylǵa jaqsaryp keledi. Osydan 5-6 jyl buryn WhatsApp arqyly kelgen qysqa beinelerdi ǵana kóre alsaq, qazir balalar mobildi internet arqyly kez kelgen orynda súiikti mýltfilmderin kóre beretin boldy. Qazirgi internet jyldamdyǵy eldiń qajettiligin tolyq ótep otyr. Degenmen, bizdiń elimiz 5G internetti eń alǵashqylardyń biri bolyp iske qosady. Bul bizdiń strategiialyq maqsattarymyzdyń biri. Eń áýeli Nur-Sultan, Almaty, Shymkent qalalary qosylady. Al negizinde qazirgi qajettiligimizdi 4G erkin jaýyp tur. Árine 5G-diń kelýimen qyzmet sapasy da, jyldamdyq ta ózgeredi. Ol úshin áýeli eldegi infraqurylym buǵan sai bolýy kerek», - dedi kompaniia ókili.
