Astanada ýniversitet jataqhanasynyń komendanty stýdentter men qyzmetkerlerden zańsyz aqsha jinap, sheteldikterdi tirkegeni úshin 2 jylǵa bas bostandyǵynan aiyryldy, dep habarlaidy ult.kz.
Sot málimetinshe, ol bes jyl boiy stýdentter men qyzmetkerlerden ai saiyn 14 300 teńgeden jinap, ýniversitetke 3 mln teńgeden astam zalal keltirgen.
Sonymen qatar 2024 jylǵy qyrkúiek pen 2025 jylǵy aqpan aralyǵynda 57 shetel azamatyn ýaqytsha tirkep, árqaisysynan 40 myń teńgeden alǵan.
Sottalýshy kinásin moiyndamaǵan. Alaida sot onyń kinásin dáleldermen rastalǵan dep tanydy.
Oǵan qosa, komendant úsh jyl boiy belgili bir laýazymdardy atqarý quqyǵynan aiyryldy. Úkim ázirge zańdy kúshine engen joq.
